Ձեր վստահելի աղբյուրը

«ՀՀԿ-ն այսօր նույն գծի մեջ է, որը պատգամել է Աշոտ  Նավաարդյանը։ Թե այն ժամանակ մենք  պայքար էինք մղում անկախության համար, թե այսօր է գնում պայքար անկախության համար, բայց այսօր կա մեկ տարբերություն»,- «Եռաբլուր» զինվորական պանթեոնում լրագրողներին ասաց ՀՀԿ ԳՄ անդամ Էդուարդ Շարմազանովը։

ՀՀԿ գործիչները Եռաբլուր են այցելել ՀՀԿ հիմնադիր նախագահ Աշոտ Նավասարդյանի մահվան տարելիցի առիթով։

Շարմազանովի խոսքով, եթե  1990-ականներին հիմանական սպառնալիքը թուրքերն ու ադրբեջանցիներն էին, ապա այսօր մենք ունենք երկու սպառնալիք՝ թուրք-ադրբեջանական արտաքին սպառնալիքը, երկրորդ՝ Հայաստանի թրքահպատակ ռեժիմը, որը կեղծ թեզեր շրջանառելով և «անկախության ու ինքնիշխանության» թեզերի տակ Հայաստանը տանում է դեպի թուրքական վիլայեթացում։

«Սա ավելի վտանգավոր է. կեղծ քրիստոնյաները, կեղծ մարգարեները, կեղծ ազգայնականները շատ ավելի վտանգավոր են իրական թշնամիներից»,- ասաց Շարմազանովը։

Նրա խոսքով, շատ բարդ ժամանակաշրջան է, իրոք, Հայաստանի Հանրապետության բովանդակային գոյությունը իրական սպառնալիքի տակ է։

«Հայաստանի երրորդ հանրապետությունը, որի հիմնադիրներից է Աշոտ Նավասարդյանը, նաև Հանրապետականը, այլևս գոյություն չունի, որովհետև երրորդ հանրապետության հիմքը դա Արցախյան շարժում էր, հայկական Արցախն էր, իսկ այսօրվա կառավարիչները Նիկոլ Փաշինյանի  գլխավորությամբ, արդեն տարիուկես է հրապարակային հրաժարվել են  Արցախից, Արցախը հաջողությամբ ճանաչել են Ադրբեջանի մաս, հիմա էլ  բյուջե են քննարկում, որտեղ Արցախի մասին ոչ մի տող չկա»,- ասաց Շարմազանովը։

Միաժամանակ նա հիշեցրեց Աշոտ Նավասարդյանի գլխավոր պատգամը՝ «նույնիսկ  ամենաբարդ, ամենաողբերգական շրջանում անկախ ազգային պետության գաղափարից, պայքարից չհրաժարվել»։