Ձեր վստահելի աղբյուրը

Իսրայելը չի կարողանա երկարատև գործողություն իրականացնել Գազայում պաղեստինյան արմատական ՀԱՄԱՍ շարժման դեմ. այն պետք է ավարտվի առաջիկա երկու-երեք շաբաթվա ընթացքում՝ Արևմուտքի, հատկապես ԱՄՆ-ի աճող դժգոհության պատճառով: ՏԱՍՍ-ի փոխանցմամբ, նման կարծիք է հայտնել Իսրայելի նախկին վարչապետ, երկրի պաշտպանության նախկին նախարար Էհուդ Բարաքը «Politico» թերթին տված հարցազրույցում։

«Հնարավորությունների պատուհանը փակվում է, և պարզ է, որ հարձակման շուրջ ամերիկացիների հետ շփումը կմեծանա։ Ամերիկան չի կարող թելադրել Իսրայելին, թե ինչ անել, բայց մենք էլ չենք կարող անտեսել դրանք»,- ընդգծել է նախկին վարչապետը՝ մատնանշելով Վաշինգտոնի դերը՝ որպես Իսրայելի անվտանգության գլխավոր երաշխավորի:

Նա նաև նշել է, որ վերջին շրջանում ամերիկացի պաշտոնյաների հռետորաբանությունը փոխվել է, և գնալով ավելի հաճախ են հնչում մարտական գործողություններում հումանիտար դադարի կոչեր։

Նա կարծում է, որ Վաշինգտոնի պահանջները բավարարելու համար Թել Ավիվի տրամադրության տակ «մնացել է ոչ ավելի, քան երկու-երեք շաբաթ»։ Նախկին վարչապետը նաև հավելել է, որ պաղեստինյան ՀԱՄԱՍ շարժման լիակատար ջախջախման համար անհրաժեշտ են ամիսներ կամ նույնիսկ մեկ տարի: Բարաքն ընդգծել է, որ Արևմուտքի աջակցությունը թուլանում է Գազայում խաղաղ բնակիչների մահվան և այն մտավախությունների պատճառով, որ դա կարող է տարածաշրջանում շատ ավելի մասշտաբային և աղետալի պատերազմ հրահրել:

Նրա խոսքով՝ իսրայելական ռազմական գործողությունից հետո Գազան պետք է վերահսկողության տակ վերցնեն արաբական բազմազգ ուժերը։