Ձեր վստահելի աղբյուրը

«Ինձ թվում էր՝ գործը պետք է կարճվեր, որովհետև իմ՝ ոչ իրավաբանի կարծիքով, այստեղ գործ չկա, այնուամենայնիվ, դատարանը հստակ որոշում ընդունեց, որին մենք ստիպված ենք ենթարկվել»,- Երևան քաղաքի առաջին ատյանի ընդհանուր իրավասության քրեական դատարանի Աջափնյակ նստավայրում դատական նիստից հետո լրագրողներին ասաց Ադրբեջանի հարցերով փորձագետ Արմինե Ադիբեկյանը, ում մեղադրանքի փաստական հիմքը 2022թ. սեպտեմբերին կատարված ֆեյսբուքյան գրառումն է. «Եթե Փաշինյանը չդիմի Հիտլերի վերջին քայլին, ապա նրան սպասում է Գեբելսի ճակատագիրը»։

Խոսելով «Մենք ու մունք» նախաձեռնության մասին, որն աջակցություն է  ցուցաբերում Արցախից բռնի տեղահանվածներին, նա ասաց, որ արդյունքների մասին վաղ է խոսել, վերջնահաշվարկը կատարված չէ. «Այս պահին մենք 10 հազարից ավելի անձի ենք սպասարկել։
Նախաձեռնությունը ստեղծվել էր 2020 թվականին, երբ տեղահանված կանայք ու երեխաներ էին եկել Երևան, նրանց էինք օգնում, 2023-ին վերսկսվեց արդեն փորձ հավաքած նախաձեռնությունը։ Հավաքվել են մարդիկ, որոնք իրենց անձնական ռեսուրսներով, մերձավոր շրջապատի հնարավորություններն օգտագործելով՝ կազմակերպեցին այս նախաձեռնության անխափան աշխատանքը։ Մինչ օրս շարունակում ենք այդ գործունեությունը։ Բայց ինչպես բոլոր ռեսուրսները, մեր ռեսուրսներն էլ սպառվում են, նոյեմբերի 15-ից ծրագիրը փակելու ենք»։