Ձեր վստահելի աղբյուրը

Նոյեմբերի 9-ին Նյու Յորքում Christie's-ի աճուրդում  ամերիկահայ հանրահայտ նկարիչ Արշիլ Գորկու «Ածխացած սիրահարները I» (1946 թ) կտավը ռեկորդ է սահմանել։ Նկարը նախնական գնահատվել էր ավելի քան 20 միլիոն դոլար, այն վաճառվել է 23,4 միլիոն դոլարով:

Կտավը ճանաչված կոլեկցիոներ Դեյվիդ Գեֆֆենի հավաքածուից էր։

Կտավն առաջին անգամ ցուցադրվել է 1953 թվականին Նյու Յորքի Սիդնի Ջանիս պատկերասրահում, այնուհետև հայտնվել է Ժամանակակից արվեստի և Գուգենհայմի թանգարաններում։

1946 թվականի հունվարին Գորկու արվեստանոցում բռնկվում է հրդեհ,  այրվում են նկարչի 20 կտավները, գրքերը: Ժամանակ չկորցնելով՝ նա նոր ստուդիա է վարձակալում և սկսում աշխատել։ Իսկ նոր ստեղծած աշխատանքներն էլ խորհրդանշում էին վերածնունդ, որոնցով էլ նկարիչն իր ուրույն տեղը հաստատեց 20-րդ դարի արվեստում:  Ստեղծած նկարների թվում էին երեք կտավներ՝ «Ածխացած սիրահարները» վերնագրով։

Christie's-ի կայքում Արշիլ Գորկու «Ածխացած սիրահարները I»  աշխատանքն աճուրդում ներկայացնելու մասին նյութը վերնագրված է՝ «Ամենահիասքանչ փյունիկ». ինչպես Արշիլ Գորկին վեր հառնեց մոխիրներից՝ գլուխգործոց ստեղծելու համար»։