Ձեր վստահելի աղբյուրը

«Ժողովուրդ» թերթը գրում է.

«Շավարշ Գրիգորյանը 2023 թվականի ապրիլի 17-ին նշանակվել է Երևանի քաղաքապետարանի աշխատակազմի քարտուղարի ժամանակավոր պաշտոնակատար։ Գրիգորյանը Արսեն Թորոսյանի նախարար աշխատած ժամանակահատվածում զբաղեցրել է առողջապահության նախարարի տեղակալի պաշտոնը: Նա աշխատանքից ազատվել է 2020թ. դեկտեմբերին, իսկ 2021թ. հոկտեմբերից մինչև 2022թ. ապրիլի 28-ը զբաղեցրել է ՊԵԿ նախագահի խորհրդականի պաշտոնը:

Հավելենք նաև, որ առողջապահության նախկին նախարար, այժմ ԱԺ պատգամավոր Արսեն Թորոսյանի ընտանիքը ձկնաբուծական բիզնես է սկսել Արագածոտնի մարզում, «Ֆիշ ֆարմ մենեջմենթ» ՍՊԸ-ի բաժնետերերից մեկը թերևս պաշտոնյայի հայրն է։ «Ֆիշ ֆարմ մենեջմենթ» ՍՊ ընկերության հիմնադիրները եղել են Շավարշ Գրիգորյանը և նրա կինը՝ Էդիտա Գուրօղլյանը:

Մինչ նախարարի տեղակալ նշանակվելը Շավարշ Գրիգորյանը եղել է «Առողջապահական ծրագրերի իրականացման գրասենյակ» պետական հիմնարկի տնօրենի պաշտոնակատար, ինչպես նաև զբաղեցրել է Սևանի հոգեկան առողջության պահպանման կենտրոնի տնօրենի պաշտոնը: Նա եղել է նաև առողջապահության նախկին նախարար Լևոն Ալթունյանի օգնականը։ Ըստ մեր տեղեկությունների՝ Գրիգորյանին են պատկանում մի քանի ձկնաբուծական ընկերություններ ևս, սակայն նրա հայտարարագրում որևէ տող այդ կազմակերպություններից ստացված եկամուտների մասին չկա։

Ավելին՝ Շավարշ Գրիգորյանի՝ 2022 թվականի տարեկան հայտարարագրում եկամուտները կազմել են 214 մլն 584 հազար դրամ։ Եկամուտների գրեթե 74 մլն դրամը վարկ է «Մելլաթ բանկ» ՓԲԸ-ից և «ՎՏԲ-Հայաստան» բանկից։ Շավարշ Գրիգորյանը 142 մլն 740 հազար դրամ ստացել է գույքի օտարումից, սակայն մութ է մնում այն կետը, թե այդ ինչ թանկարժեք գույք է ունեցել և վաճառել նախկին փոխնախարարը։ Փաստն այն է, որ Գրիգորյանը, հանդիսանալով մի շարք ձկնաբուծական ընկերությունների համասեփականատեր, որևէ եկամուտ չի ստացել այդ ընկերություններից, ինչը կասկածելի է։

Նա 2021 թվականից հանդիսանում է «ՄԱԿ ՖԻՇ» ՍՊԸ-ի 8.34% բաժնետեր և «Հայնավթ» ՓԲԸ-ի 100% բաժնետեր և այս ընկերությունների շրջանառությունից որևէ ֆինանսական եկամուտ չի ստացել։ Գրիգորյանը հայտարարագրել է 1 բնակարան Երևանի բազմաբնակարան շենքերից մեկում, որը ձեռք է բերել 2023 թվականի մարտի 17-ին։ Հայտարարագրից հասկանում ենք, որ բնակարանը ձեռք է բերվել հիփոթեքով, որի մայր գումարի մնացորդը հաշվետու տարվա վերջում կազմել է 58 մլն 078 հազար դրամ։ Բանկային հաշիվների մնացորդները կազմել են 20 մլն 267 հազար դրամ, 400 ԱՄՆ դոլար և 657 եվրո։

Երևանի քաղաքապետարանի աշխատակազմի ղեկավարը հայտարարագրել է 2 մեքենա, որից մեկը բեռնատար՝ KRAZ մակնիշի, ձեռք բերված 2000 թվականին, և 2022 թվականին ձեռք բերված՝ 2021 թվականի արտադրության VOLKSWAGEN մակնիշի։ Նրան է վստահված իրականացնել քաղաքապետարանի աշխատակազմի գործունեության կազմակերպումն ու ղեկավարումը, ինչպես նաև համակարգել և վերահսկել քաղաքապետարանի աշխատակազմի իրավաբանական, ֆինանսական, գնումների, եկամուտների հաշվառման և գանձման, կազմակերպական, մարդկային ռեսուրսների կառավարման վարչությունների, քարտուղարության, մատակարարման և տեխնիկական սպասարկման ծառայության և առաջին և զորակոչային հարցերի կազմակերպման բաժնի աշխատանքները:

Հավելենք նաև, որ Շավարշ Գրիգորյանը հանդիսանում է արդարադատության նախարար Գրիգոր Մինասյանի մտերիմ ընկերը, և վերջին գործակարգավարական նիստի ընթացքում քաղաքապետ Ավինյանը վրդովված նշեց, որ Տորք Անգեղի այգում դատարանը ստիպում է տալ շինթույլտվություն, ինչը զայրացրել էր Ավինյանին։ Նա հրահանգել է Շավարշ Գրիգորյանին զբաղվել այդ հարցով. վերջինս, ըստ երևույթին, հարցերը պետք է կարգավորի նախարար Մինասյանի հետ»։

Մանրամասները թերթի այսօրվա համարում