Ձեր վստահելի աղբյուրը

«Ակնհայտ է, որ արդեն որևերրորդ դեպքն է, որ առաջին դեմքերով չեն մասնակցում հանդիպումներին և սա այլ կերպ, քան դիվանագիտության մեջ ընդունված «դեմարշը», հնարավոր չէ որակել»,-այդ մասին խորհրդարանում լրագրողներին ասաց «Հայաստան» խմբակցության պատգամավոր Արմեն Ռուստամյանը, պատասխանելով ՀԱՊԿ առաջիկա գագաթնաժողովին Նիկոլ Փաշինյանի չմասնակցելու որոշման մասին հարցին:

Նրա խոսքով՝ ներկայում ոչ թե գնում է Հայաստանի անվտանգային համակարգի փոխլրացման, այլ ճամբարափոխության գործընթաց և այն, ըստ ընդդիմադիր պատգամավորի, շատ ծանր հետևանքներ կարող է ունենալ Հայաստանի համար:

«Մենք փոխում ենք ճամբարն այն ժամանակ, երբ ակնհայտորեն գոյություն ունի Ռուսաստան-Արևմուտք հակամարտություն: Բոլորը տեսնում են, որ մենք ՌԴ-Արևմուտք հակամարտությունը բերում ենք մեր տարածք և սա կործանարար հետևանքներ է ունենալու Հայաստանի համար, իրավունք չունենք այդ հակամարտության զոհը դառնալ»,-ասաց ընդդիմադիր պատգամավորը և հավելեց. «Երբ մեր թշնամիներն այդ հակամարտությունն ի շահ իրենց են օգտագործել, մենք այդ հակամարտությունը բերում ենք մեր տուն»:

Նրա խոսքով՝ աշխարհաքաղաքական առումով աշխարհում մեծ խնդիր է լուծվում ՌԴ-Արևմուտք հակամարտության ընթացքով, ինչպես այն կավարտվի, ըստ այդմ էլ կլինի նոր աշխարհ:

Արմեն Ռուստամյանը հայտարարեց, որ իշխանության քաղաքականությունը տանում է նրան, որ Արևմուտք-ՌԴ հակամատությունը իր լուծումները գտնի Հայաստանում և ի հաշիվ հայերի: