Ձեր վստահելի աղբյուրը

Պետահ-Տիկվայի «Նաիրի» միության նախագահ, «Իսրայելահայեր» թերթի գլխավոր խմբագիր Արտյոմ Չերնամորյանը տեսանյութ է հրապարակել Երուսաղեմի հայկական թաղամասի հարավարևմտյան անկյունում գտվող «Կովերի պարտեզ» -ից։

«Ահաբեկչություն է հայ ժողովրդի դեմ։ Այստեղ կան տրակտորներ, որոնք եկել են քանդելու մեր հայկական տարածքը։ Սկսել ենք պայքարել, վրաններ ենք տեղադրել այստեղ»,- ասում է Չերնամորյանը։ 

Նա նաև հայտնում է, որ երեկ ձերբակալվել էին  3 հայեր՝  անչափահաս Դանիել Գասաբյանը, նրա հայրը՝ Վահե Գասաբյանը և Պետիկ Կիրակոսյանը։ Գիշերը ազատ են արձակվել։

«Նրանք օրենքի  որևէ խախտում չէին կատարել։ Միայն ութ ժամ անց նրանց կարողացանք ազատ արձակել, բայց ոստիկանության որոշմամբ նրանք 15 օրով հեռացվել են «Կովերի պարտեզ» տարածքից, որպեսզի կարողանան մեր ակտիվիստներին հեռացնել այստեղից»,- պատմեց ականատեսներից մեկը։ 

Երուսաղեմ է այցելել նաև Իսրայելու ՀՀ դեսպանը։ 

«Դեսպանն այսօր է ժամանել, վիճակը տեսավ, բայց  Հայաստանի կողմից որևէ արձագանք չա»,- ասաց Երուսաղեմի հայերից մեկը։ 

Հիշեցենք՝ օրեր առաջ Երուսաղեմի Հայոց Պատրիարքությունը տեղեկացրել էր, որ  «Կովերի պարտեզ» կալվածքի  վարձակալությունը չեղյալ հայտարարելու նամակից հետո  երկրորդ կողմը, փոխանակ նամակին պատասխան տալու, արձագանքել էր  կալվածքի վրա առկա պարսպի և  կայանատեղերի քանդումով, ասֆալտի հեռացումով և շատ ավելի մեծ վնաս պատճառելու սպառնալիքով: Ի պատասխան այս պահանջի՝ Երուսաղեմի Հայ Պատրիարքը, Սրբոց Յակոբեանց Միաբանության անդամները և  Հայ համայնքի անդամները հավաքվել էին այնտեղ՝ խաղաղ կերպով իրենց դժգոհությունն ու անհամաձայնությունը հայտնելու այդ պահանջին։ Մի քանի ժամ անց կողմերը պայմանավորվել էին հեռանալ կալվածքի տարածքից և ոչինչ ձեռնակել այնքան ժամանակ, մինչև Պատրիարքությունը չստանա համաձայնագիրը չեղյալ հայտարարել իր ուղարկած նամակի պատասխանը։ Սակայն օրերս իրավիճակը կրկին սրվել է։

«Կովերի պարտեզ» գտնվում է պատմական Սիոն լեռան վրա, Երուսաղեմի հայկական թաղամասի հարավարևմտյան անկյունում:  «Կովերի պարտեզ» կալվածքի վերաբերյալ 2021թ․ հուլիսի 8-ին ստորագրված համաձայնագրով թաղամասի մի հատված պատրիարքարանը 99 տարով վարձակալության էր հանձնել իսրայելական ընկերությանը: Երուսաղեմի հայկական համայնքը մի քանի բողոքի ցույցեր է կազմակերպել, հայտարարություն տարածել՝ Հայոց պատրիարքին կոչ անելով չեղարկել «Կովերի պարտեզ» կալվածքի գործարքը և առաջարկելով այդ հարցում համայնքի աջակցությունը։ Դեռևս 2021թ նոյեմբերին Մայր Աթոռում Գերագույն հոգևոր խորհուրդը քննարկել էր Երուսաղեմի Հայոց պատրիարքարանի կողմից «Կովերի պարտեզ» կալվածքի վարձակալության հանձնելու խնդիրը և կոչ էր արել չեղարկել այդ որոշումը։

Այս տարվա նոյեմբերի 1-ի Երուսաղեմի Հայոց պատրիարքությունը նամակ է ուղարկել Xana Gardens Ltd-ին՝ հայտնելով, որ չեղարկել է Երուսաղեմի Հին քաղաքի հայկական թաղամասի «Կովերի պարտեզ» կալվածքի վերաբերյալ 2021թ․ հուլիսի 8-ին ստորագրված համաձայնագիրը։