Ձեր վստահելի աղբյուրը

«Նախագիծը վերաբերում է հիփոթեքային վարկի սպասարկման համար եկամտային հարկի վերադարձի համակարգին և դրանով առաջարկվում է ըստ մարզերի և տարիների աստիճանաբար կրճատել եկամտային հարկի վերադարձի համակարգի կիրառության շրջանակը»,-կառավարության նիստում հայտնեց ֆինանսների նախարար Վահե Հովհաննիսյանը՝ զեկուցելով Հարկային օրենսգրքում լրացումներ կատարելու նախագիծը:

Ըստ նախարարի՝ այդ որոշմամբ խրախուսվում է մարզերում քաղաքացիների և տնտեսվարողների որոշումների կայացումը և ժամանակին մեջ առաջ բերելը:

«Երկրորդ նպատակը եկամտային հարկի վերադարձի համակարգի կիրառության շրջանակի հետագա երկարաժամկետ հեռանկարում ընդլայնումը զսպելն է»,-հայտարարեց նախարարը:

Հովհաննիսյանը հայտնեց, որ նախագծով սահմանվում է, որ 2027թ. հունվարի 1-ից հետո ստացված հիփոթեքային վարկերի մասով չի վերադարձվում, եթե գույքը գտնվում է Երևանին հարակից Արագածոտնի, Արմավիրի և Արարատի մարզերում, իսկ  2029թ  հունվարի 1-ից չի վերադարձվի մյուս մարզերում գտնվող գույքի դեպքում:

Նա հայտնեց, որ սահմանափակումները չեն կիրառվելու սահմանամերձ բնակավայերի նկատմամբ:

Վահե Հովհաննիսյանի տեղեկացմամբ՝ նախագծով սահմանվում է, որ 2025 թվականի հունվարից եկամտահարկի վերադարձը յուրաքանչյուր եռամսյակի համար չի կարող գերազանցել  750 հազար դրամը:

Նիկոլ Փաշինյանը հետաքրքրվեց, թե արդյո՞ք նախագծով անհավասար պայմաններ են ստեղծվում Երևանում և մարզերում շինարարություն անող ընկերությունների համար: Վահե Հովհաննիսյանը, Ռուստամ Բադասյանը, փոխվարչապետ Մհեր Գրիգորյանը չկարողացան հիշել խնդրի կարգավորման՝ նախկինում ընդունված նախագծերի դրույթները:

Փաշինյանը որոշեց նախագիծը հանել օրակարգից: