Ձեր վստահելի աղբյուրը

«Կարծում եմ, որ արդար ու ճիշտ կլինի, որ երևանցին իմանա, որ «Մայր Հայաստան» դաշինքը իմ անունից Վարչական դատարան դիմում է տվել, որում պնդում է. որ Տիգրան Ավինյանն օրենքին համապատասխան չի ստանձնել իր լիազորությունները»,-Երևանի ավագանու այսօրվա նիստում հայտարարեց  «Մայր Հայաստան» խմբակցության անդամ Սամվել Հակոբյանը:

Նա հայտնեց, որ Տիգրան Ավինյանից առաջ նախկին երեք քաղաքապետերը երդմնակալության արարողության ժամանակ ապահովել են  ավագանու քվորումը, իսկ Ավինյանը պնդել է, որ այն արարողակարգային նիստ է:

Հակոբյանը հայտնեց, որ նույն նախադեպով Թալինում 2022 թ մայիսին քվորումը նիստի ժամանակ ապահովվել է և ընտրվել քաղաքապետ, սակայն երդմնակալության ժամանակ ավագանու քվորումը չի ապահովվել, ինչի հետևանքով երեք ամիս անց արտահերթ ընտրություններ են անցկացվել:

«ԱԺ-ում կառավարության հարցուպատասխանի ժամանակ Տիգրամ Ավինյանի  թիմակից Գնել Սանոսյանը և իր տեղակալը, հարցին թե կարո՞ղ է լինել օրենքով սահմանված նիստ, որի ժամանակ քվորում չի պահանջվում, Տիգրան Ավինյանի գործընկերները հաստատել են մեր թեզը, որ օրենքով սահմանված նիստը պարտավոր է ունենալ քվորում»,-հիշեցրեց ավագանու անդամը և հավելեց. «Զգուշացնում եմ բոլոր երևանցիներին՝ ցանկացած որոշում, հրամանյական, աշխատանք և հարաբերություն, որ ունենալու եք այս քաղաքապետարանի, այս քաղաքապետի հետը, այդքան վստահ մի եղեք, որ հետագայում այդ ամենը չի վիճարկվելու, որովհետև ըստ օրենքի՝ «արարողակարգային նիստ» ձևակերպում գոյություն չունի»:

Սամվել Հակոբյանը հայտնեց, որ ընդդիմադիրները մասնակցելու են ավագանու նիստերին, բայց դատարանում պահանջելու են, որ անցկացվի նոր երդմնակալության նիստ, ինչի հետևանքով ոչ իշխանական ուժերը գան մասնակցեն և ապահովեն քվորումը, ապա նախկին երդմնակալությունից հետո ընդունված որոշումները նորից կկատարվեն, իսկ եթե ոչ իշխանական ուժերը չապահովեն քվորումը, ապա տրամաբանական կլինի իրականացնել նոր արտահերթ ընտրություններ:

Տիգրան Ավինյանմ ավագանու ընդդիմադիր անդամին հաջողություն մաղթեց իր դեմ հայցած դատական գործում: