Արցախի քաղաքացիների կենսաթոշակների ու նպաստների մասին ԱՍՀՆ պատասխանները
ՀՀ աշխատանքի և սոցիալական հարցերի նախարարի մամուլի խոսնակ Զառա Մանուչարյանը գրում է․
«Եթե երկու բառով ներկայացնեմ ԼՂ հայրենակիցների կենսաթոշակների ու նպաստների մասին ամենաշատ հնչող հարցերի պատասխանները․
- Կենսաթոշակի ու նպաստի նշանակման համար արդյոք այս պահին կարիք կա՞ մոտենալ Միասնական սոցիալական ծառայության որևէ տարածքային կենտրոն։
- Այս պահին` ո՛չ։ Այսօր ԱԺ-ն երկրորդ ընթերցմամբ ու ամբողջությամբ ընդունել է համապատասխան օրենքները։ Այդ օրենքներով Կառավարությանը վերապահված լիազորությունների շրջանակում առաջիկայում կսահմանվեն կենսաթոշակ նշանակելու պարզեցված ընթացակարգեր, կմշակվի և կներդրվի համապատասխան ծրագրային ապահովում։ Խնդրում ենք շարունակել հետևել պաշտոնական լրահոսին՝ ՀՀ կառավարության ու Աշխատանքի և սոցիալական հարցերի նախարարության ֆեյսբուքյան էջերին ու կայքէջերին․ նոր անելիքների մասին անմիջապես կտեղեկացնենք։
- Կա՞ որևէ քայլ, որը կենսաթոշակառուն և նպաստառուն պետք է անի այս պահին։
- Այո՛, առայժմ անհրաժեշտ է դիմել ՆԳՆ միգրացիայի և քաղաքացիության ծառայության տարածքային անձնագրային բաժիններ՝ իրենց բնակության վայրում հաշվառվելու համար (կամ փաստացի կամ մշտական հիմունքներով՝ տարբերություն չկա):
- Արդյոք որևէ իրավունք ձեռք բերու՞մ եք անշարժ գույքի հանդեպ, եթե հաշվառվում եք օրինակ՝ վարձակալած տան հասցեում։
- Ո՛չ, հաշվառումը որևէ գույքային իրավունք չի տալիս։
- Եթե վարձով տան սեփականատերը թույլ չի տալիս հաշվառվել իր տան հասցեով, ի՞նչ անել։
- Եթե նախապես հայտնի է բնակելի տարածության սեփականատիրոջ առարկությունն իր բնակելի տարածության հասցեում անձանց հաշվառելու վերաբերյալ, ապա Բնակչության պետական ռեգիստրում կատարվում է նշում անձի փաստացի բնակվելու (գտնվելու) վայրի մասին․ այսինքն՝ հաշվառելիս կարող են պարզապես նշել շենքի համարը կամ փողոցի անունը։
- Կենսաթոշակ կամ նպաստ ստանալու համար ՀՀ քաղաքացիությունը պարտադի՞ր է։
- Ո՛չ, պարտադիր չէ, ՀՀ քաղաքացիություն ձեռք բերելը կամովի է։ Ձեր ունեցած ժամանակավոր պաշտպանության կարգավիճակը, ինչպես նաև բնակության վայրում հաշվառումը բավարար են կենսաթոշակի կամ նպաստի նշանակման համար։
- Արդյո՞ք օրենքներով սահմանված նոր կարգավորումները, բացի տարիքային աշխատանքային կենսաթոշակից, վերաբերում են նաև զինվորական կենսաթոշակին, ծերության նպաստին, երեխայի խնամքի նպաստին, չաշխատող մայրերի մայրության նպաստին, հաշմանդամության նպաստին, կերակրողին կորցնելու նպաստին։
- Այո՛, կարգավորումները վերաբերում են նշված բոլոր վճարատեսակներին։
- Արդյո՞ք ստանալու եք կենսաթոշակ ու նպաստ նույն չափով, որքան ԼՂ-ում։
- ՀՀ-ում կենսաթոշակ ու նպաստ տրամադրվելու է ՀՀ օրենսդրությամբ սահմանված չափերով»։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
