Ձեր վստահելի աղբյուրը

«Ավագանու աշխատանքներին ձեր մասնակցության առաջին իսկ օրը տեղի ունեցավ այդ սադրանքը, ես այդ գնահատականը տվել եմ և կարծում եմ, որ դրանք ճիշտ են, որովհետև, եթե կա սադրանք, կա հնարավորություն որ կլինեն սադրվողներ»,-Ավագանու այսօրվա նիստում ելույթ ունենալով հայտնեց Երևանի քաղաքապետի առաջին տեղակալ Արմեն Փամբուխչյանը:

Նա հայտարարեց, որ իրենց թիմակիցները՝ ՔՊ-ական ավագանիները և վարչական շրջանների ղեկավարները այդ սադրանքին տրվել են և դրա համար ինքը ֆեյսբուքյան իր գրառման մեջ ընդհանուր ներողություն է խնդրել՝ նաև իր թիմակիցների համար:

Դիմելով մինչ իր ելույթն ամբիոնին մոտեցած «Մայր Հայաստան» խմբակցության անդամ Մեսրոպ Մանուկյանին՝ Փամբուխչյանը նշեց, որ Մայր Հայաստանը ներողություն չխնդրեց իրենց անդամների գործողությունների համար:

Նա հայտարարեց, թե ՔՊ-ն պատրաստակամ է համերաշխ գործընկերային աշխատանքի:

«Երեկ մեր կոալիցիոն գործընկերների հետ լուռ մեր տեղերում նստած լսել ենք տարբեր սադրանքները և այսօր էլ մենք լուռ լսեցինք ձեր քննադատությունը, բայց այն որևէ մեկին իրավունք չի տալիս, որ կարողանա որոշակի միջոցների դիմել՝ բառապաշարի առումով: Եթե կա սադրանք, պետք է պատրաստ լինել, որ սադրվողները  կկարողանան որոշակի գործողություններ անել»,-հայտարարեց Արմեն Փամբուխչյանը: