Ձեր վստահելի աղբյուրը

«Ազգային ժողովում ճեպազրույցում և հաջորդիվ ելույթի ընթացքում ամեն ինչ պարզ հայերենով ասված էր, ինձ այստեղ հրավիրելու կարիքը բացարձակ չկար»,- Քննչական կոմիտեում հարցաքննությունից հետո լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։

Նա նշեց, որ հարցաքննության ժամանակ ևս մեկ անգամ մանրամասնել է, թեպետ նույն  ճեպազույցի ընթացքում բացատրված էր, թե ինչ է նկատի ունեցել և այս պահին, կարծես թե, այլ հարցեր քննչականը չի ունեցել։

«Ակնհայտ է՝ անկախ նրանից, որ ես ներգրավված եմ որպես վկա, բայց  պարզագույն քրեական հետապնդում է, որն ակնհայտ երևում է նաև գործի ընթացքից, հարցերից և այլնից։ Բնականաբար,  այն պայմանավորված է իմ քաղաքական գործունեությամբ։

Ենթադրում եմ, որ  իրենց պարզամիտ հաշվարկը կայանում է նրանում,  որ սրանով  ինչ որ կերպ պետք է սահմանափակեն իմ գործունեությունը։ Այն, բնականաբար, չի սահմանափակվելու։ Սա ճնշում էլ չի, ճնշումիկ է, նմանօրինակ ճնշումիկների  վրա ես, բնականաբար, թքած ունեմ։ Ուստի, կարծում եմ, այն կփորձեն օգտագործել հետագայում իմ դեմ։ Ինչ ուզում են, թող անեն։
Բայց  համադրելով սա և այն, ինչ անում են Արմեն Աշոտյանի, Նարեկ Մալյանի, մեր երկրում 50 այլ  քաղբանտարկյալների նկատմամբ, սա նույնիսկ ուշադրության արժան չէ»,- ասաց Հայկ Մամիջանյանը։

Հիշեցնենք, որ ՀՀԿ ԳՄ անդամ, ԱԺ «Պատիվ ունեմ» խմբակցության ղեկավար Հայկ Մամիջանյանին կանչել էին քննչական կոմիտե հարցաքննության՝ ՀՀ քրեական օրենսգրքի 330-րդ հոդվածի (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը) 1-ին մասի հատկանիշներով նախաձեռնված քրեական վարույթի շրջանակում: Վարույթի նախաձեռնման հիմքում դրվել է այս տարվա սեպտեմբերի 12-ին Ազգային ժողովում Մամիջանյանի տված ճեպազրույցի և ելույթի ժամանակ արտահայտած խոսքերը։

Հիշեցնենք, որ սեպտեմբերի 12-ին ԱԺ-ում լրագրողների հետ ճեպազույցում Հայկ Մամիջանյանն ասել էր, որ Երևանը փոխվելու է մեր բոլորի, դրսում կանգնած քաղաքացիների, հայրենասերների քրտինքով, և եթե Փաշինյանն անմտություն անի՝ նաև արյամբ. «Ինչ -որ պարավոր ենք անել քաղաքական ուժեր, անում ենք, կանենք։ Մեր բանաձևը պարզ է՝ մենք մեր անելիքը կանենք, ուրախ կլինենք, վստահ ենք, որ մեր կողքին կկանգնեն մեր հայրենասեր քույրերն ու եղբայրները, այլընտրանք չկա»։ Լրագրողի հարցին՝ արդյո՞ք այս հայտարարությունը չի դիտարկվի որպես բռնության կոչ, Հայկ Մամիջանյանը կրկնեց․ «Եթե Փաշինյանն անմտություն անի և նորից, ինչպես անցած տարվա հունիսին, խաղաղ ցուցարարների նկատմամբ կիրառի հատուկ միջոցներ, այսինքն, կրակ բացի, մեկնաբանությունները թողնում եմ ձեզ։ Բայց ես վստահ եմ, որ հայրենիքի գոյությունը, ապագան արժանի է ցանկացած զոհողության»։

Հայկ Մամիջանյանն ասաց, որ, իր տեղեկություններով, հաղորդումը ներկայացրել է  Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցը։

«Չգիտեի, որ ինքն իմ «արվեստի» մեծ ֆանատն է, թող շարունակի նայել, լսել իմ ասածները, կարող է մի օգուտ տա իրեն։

Հայրենասիրություն բառը, հավանաբար, Սաքունցը չի սիրում, ամեն անգամ նյարդային բաներ է ունենում այդ բառը լսելուց»,- ասաց Մամիջանյանը։ 

Նա նաև նշեց, որ եթե Նիկոլ Փաշինյանը որոշել է իրենց  փորձել վախեցնել քրեական գործերով կամ որոշ ընկերների պարագայում ազատությունից  զրկելով, ապա «ինքն իր արշինով է մեզ չափում»։

«Այստեղ դրանից վախեցող չկա»,- ասաց ընդդիմադիր գործիչը։

«Պատիվ ունեմ» խմբակցության ղեկավարն ասաց, որ իրենք պայքարելու են հայրենիքը հանձնելու դեմ. «Խաղաղություն չէ, հայրենիք հանձնել է։ Խաղաղությանը ոչ մեկս էլ դեմ չենք։ Խոսքը գնում է  հայրենիքը հանձնելուն, Ադրբեջանի  ուլտիմատումները կատարելուն և այո, մենք դրա դեմ պայքարելու ենք»։ 

Նա նշեց, որ