Ձեր վստահելի աղբյուրը

Արցախի Հանրապետության Պաշտպանության բանակի նախկին հրամանատար Սամվել Բաբայանը, ով 44-օրյա  պատերազմի ժամանակ եղել է Արցախի Անվտանգության խորհրդի քարտուղար, չի ընդունում, որ ինքը որևէ մեղք է ունեցել պատերազմի պարտության մեջ։ 

44-օրյա պատերազմի հանգամանքներն ուսումնասիրող քննիչ հանձնաժողովի նիստից հետո լրագրողի հարցին՝  բոլորի մեղքերը թվարկեցիք, թե ով, ինչ սխալ է արել, որը բերել է պատերազմում պարտության, ո՞րն է եղել իր մեղքի բաժինը, նա պատասխանեց. «Դուք գտնում եք,  քանի որ այդ պաշտոնում եմ եղել, պետք է ինչ-որ մեղք ունենա՞մ»։

«Չունե՞ք»՝ լրագրողի ճշտող հարցին պատասխանեց. «Իհարկե, ոչ»։

Հարցին՝ 44-օրյա պատերազմը կանգնեցնելու քանի՞ հնարավորություն է եղել, նա ասաց. «Մի հատ լավ հնարավորություն չի եղել։ Պատերազմի ժամանակ ուժեղը թելադրում է իր կամքը։ Ադրբեջանն ամեն անգամ իր պահանջները դրել է՝ մինչև Շուշին չտան իրեն, պատերազմը չի կանգնեցնելու»։

Նա հայտարարեց նաև, որ մինչև 44-օրյա պատերազմը սկսելն է հասկացել, որ Ադրբեջանը կհաղթի։

«Դրա համար ես նամակներով դիմել եմ և առաջվա ղեկավարին, և գործող ղեկավարին։ Նիկոլ Փաշինյանին գրավոր գրել եմ, որ դատապարտված եք պարտության։ Գրավոր։ Հետո պարտվել ենք այն սցենարով, որը ես գրել եմ»,- ասաց նա։

Ս.Բաբայանը նշեց, եթե ռազմաքաղաքական ճիշտ ղեկավարություն նշանակված լիներ, հայկական կողմը կհաղթեր պատերազմում։

Միաժամանակ նա նշեց, որ Նիկոլ Փաշինյանը ստեղծված իրավիճակում արել է ստիպված քայլեր, որոնք պարտավոր է անելու։ 

«Նիկոլ Փաշինյանը սխալ է մի շարք հարցերում և մեղավոր է։ Ժամանակը կգա, օրինակները կբերեմ»,- ասաց Ս.Բաբայանը։