Ձեր վստահելի աղբյուրը

Գյուղացիներն այսօր բողոքի ակցիա էին կազմակերպել Արարատի մարզի Մրգավետ գյուղի հարակից խաչմերուկում՝ սպառնալով փակել Արտաշատ-Երևան մայրուղին։ ArmeniaSputnikը հայտնել էր, որ գյուղացիները բողոքում են, որ իրենց ձեռք չի տալիս իրենց միակ անասունը հասցնել սպանդանոց, քանի որ տեղափոխումը իրենց համար խնդիր է։

Գյուղացիները մտահոգություններ ունեն, քանի որ դեկտեմբերի 6-ից ուժի մեջ են մտնում սպանդանոցային մսի վաճառքի նոր կարգավորումները, որոնցով արգելվում է ոչ սպանդանոցային մորթի արդյունքում ստացված կենդանական ծագման հումքի և մթերքի իրացումը, իսկ նման միս հայտնաբերելու դեպքում ամբողջ խմբաքանակն առգրավվելու և ոչնչացվելու է։

Panorama.am-կապ հաստատեց Արտաշատ համայնքի բնակավայրերի վարչական ղեկավարների հետ, որպեսզի պարզի գյուղացիների հիմնական դժգոհությունների պատճառները և ակնկալվող լուծումները։

Մխչյան բնակավայրի  վարչական ղեկավար Գարիկ Դավթյանը հայտնեց, որ ակցիային մասնակցել են համայնքի մի շարք բնակավայրերի բնակիչներ և դրա ժամանակ պայմանավորվածություններ են ձեռք բերվել Մրգավետ բնակավայրի վարչական շենքում վաղը հանդիպել սպանդանոցների սեփականատերերի, մարզպետարանի, համայնքապետարանների ներկայացուցիչների  և ֆերմերների հետ։

Գ. Դավթյան- Դեկտեմբերի 6-ին օրենքն ուժի մեջ մտնելու հետ կապված դժգոհություններ կան։ Գյուղացիները հիմնականում սպանդանոցների աշխատանքից են բողոքում։ Բայց այդ պահին, ակցիայի ժամանակ միայն դժգոհ ֆերմերների կողմն էր ներկա, մյուս կողմից մարդ չկար, որ հասկանայինք իրենց դիրքորոշումը, այդ պատճառով էլ քննարկումը տեղափոխվեց վաղվան, քանի որ ճիշտ չէ միայն մի կողմին լսել, պետք է մյուս կողմից էլ լինեն, որ հասկանանք թե ինչ է խնդիրներ կան և լուծումներ գտնել։ Երևույթը նոր չէ, արդեն երկու տարի է այն անընդհատ ձգձգվում է և ես հիմա վստահ ասեմ, որ եթե դեկտեմբերի 6-ը չլիներ,այլ մյուս տարի նոյմեբերի 6-ն էլ լիներ՝ էլի այս խնդիրը բարձրաձայնելու էին, դրա համար պետք է հստակ լուծում տրվի ՝ հասկանանք, թե ինչն է խնդիրը։

Panorama.am-Գյուղացիներին հիմնականում ի՞նչն է մտահոգում։

Գ. Դավթյան-Ըստ ժողովրդի՝ սպանդանոցները քիչ են, հերթեր են լինելու ու չեն հասցնելու իրենց անասունները մորթեն և Ամանորին ընդառաջ այդ ամեն ինչը կազմակերպեն։ Գյուղացիները նաև բողոքում էին, որ  մորթվող անասուններին սպանդանոցները չեն տեղափոխում, այլ գյուղացուն են ասում, որ տեղափոխի։

Panorama.am-Բայց, ըստ օրենսդրական կարգավորման, սպանդանոցները պարտավորված են մինչև 30 կմ հեռավորությունից անասունի տեղափոխումն ապահովել։

Գ. Դավթյան-Ճիշտ եք։ Վաղվա հանդիպմանը իրենցից էլ ներկայացուցիչներ  կլինեն, որ հասկականք, թե ինչումն է խնդիրը, ինչու իրենց պարտավորվածությունները պատշաճ չեն կատարում։

Panorama.am-Գյուղացին մտահոգություն ունի, որ սպանդանոցներում հերթե՞րը շատ կլինեն և չե՞ն հասցնի իրենց անասունի միսն իրացնել։

Գ. Դավթյան-Այո, սպանդանոցներն այդ հարցում պետք է ընդառաջեն։ Մարդիկ այսօրվանից են մորթում, որպեսզի հասցնեն, և պետք է կարգավորվի այդ հարցը։ Գոնե հունվարից այդ հարցը կարգավորեն, բայց խնդիրն այն է, որ այս ամիս շատ է սպառումը լինում, իսկ անվտանգ միս սպառողին հացնելն շատ ավելի կարևոր է, քան այդ մեկ-երկու փոքր հարցերը կարգավորելը։ Մեկ մեքենա ավել լինելը սպանդանոցի տիրոջ համար խնդիր չէ։