Ձեր վստահելի աղբյուրը

«Հայաստանի կառավարությունը «Հյուսիս-հարավ» ճանապարհային միջանցքի ներդրումային ծրագրի իրականացման միջոցով ջանքեր է գործադրում վերագործարկելու և  արդիականացնելու երկրի համապատասխան ենթակառուցվածքները»,- «Նոր տարածաշրջանային իրողություններ» և «Խաղաղության խաչմերուկ» կոնֆերանսում ասաց Հայաստանի արտաքին գործերի փոխնախարար Մնացական Սաֆարյանը։

Նա նշեց, որ ծրագրի միջոցով  Հայաստանը ոչ միայն կբարելավի իր կարողությունները, այլև Հայաստանին  հնարավորություն կընձեռվի լիարժեք մասնակցել «Հյուսիս-հարավ» միջազգային տրանսպորտային միջանցքին և այլ նախաձեռնություններին։

Մ.Սաֆարյանի խոսքով, Հայաստանի կառավարությունը մեծ կարևորություն է տալիս գործընկերության զարգացմանը տարածաշրջանային և գլոբալ նշանակության  նախաձեռնությունների շրջանակներում, ինչպիսիք են «Հյուսիս-հարավ» միջազգային տրանսպորտային միջանցքը, Իրանի նախաձեռնած «Պարսից ծոց-Սև ծով» միջազգային տրանսպորտային և տարանցիկ միջանցքի իրագործումը և Հնդկաստանի ու Իրանի համատեղ նախաձեռնած Չաբահար նավահանգստի զարգացման ծրագրերը:

Ըստ ԱԳ փոխնախարարի,  Հայաստանը որպես ԵԱՏՄ անդամ կարող է կամուրջ դառնալ Իրանի, Հնդկաստանի և ԵԱՏՄ երկրների միջև:

«Այս առումով չափազանց կարևոր է «Պարսից ծոց-Սև ծով» միջազգային տրանսպորտային և տարանցիկ միջանցքը, որը կարող է լրացուցիչ խթան հանդիսանալ  առևտրի և հաղորդակցության հետագա ընդլայնման համար»,- ասաց Սաֆարյանը։

Նա վստահ է, որ Հայաստանի ճանապարհային ցանցը մեծ ներուժ ունի այդ նախագծերին աջակցելու համար։