Ձեր վստահելի աղբյուրը

Դեկտեմբերի 5-ին մեկնարկեց Ավետիք Չալաբյանի և Էմմա Սարգսյանի դեմ  սկսած դատական գործընթացը, որի ժամանակ պաշտպանական կողմը հանդես եկավ ճառով։

Ավետիք Չալաբյանի պաշտպան  Վարազդատ Հարությունյանը հայտնեց, որ իր պաշտպանյալի դեմ գործ է հարուցվել Քրեական օրենսգրքի 342 հոդվածով նախատեսված  հիմքերով։

«Հանրային մեղադրողը հղում արեց գործում առկա ապացուցներին և մեղադրականի առումով սակավախոս էր...Ես ակնկալում եմ, որ մենք կունենանք այնպիսի վերդիկտ, որի դեմ վերաքննիչ բողոք տանելու ցանկություն չենք ունենա»,-հայտարարեց Հարությունյանը՝ հավելելով, որ դատախազը  մեղադրանքները հատկորոշել է բացառապես փորձագիտական եզրակացությամբ և ձայնագրությամբ։

«Ես՝ որպես Սարգսյանի պաշտպան, ունեմ հիմնավորում, որ նրա արարքը հիմնավորված չէ և այն հանրային մեղադրանքը, որը ներկայացված է Էմմա Սարգսյանին, չի համապատասխանում այն նկարագրությանը, որը կա»,-հայտարարեց  փաստաբան  Ա Բեգլարյանը՝ պնդելով, որ արարքը հիմնավորված չէ։

Ըստ առաջադրված մեղադրական եզրակացության՝ Էմմա Գևորգի Սարգսյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար: