Ձեր վստահելի աղբյուրը

«Ո՞րն է Հայաստանի ռազամավարությունը Արցախի ապագայի վերաբերյալ ձեր «ապագա կա» ծրագրերի շրջանակներում։ Ի՞նչ կապեր ունեք  Արցախի ղեկավարության հետ։ Ինչպիսի՞ աշխատանքներ են տարվում, ի՞նչ է արվում գերիներին վերադարձնելու ուղղությամբ,  հատկապես Արցախի  ռազմաքաղաքական ղեկավարներին պաշտպանելու և դիվանագիտական ճանապարհներով հետ վերադարձնելու համար, որովհետև նրանք ահաբեկիչներ չեն»։ Ազգային ժողովում կառավարության հետ հարցուպատասխանի ժամանակ այս հարցերը «Հայաստան» խմբակցության ղեկավար Սեյրան Օհանյանն ուղղեց Նիկոլ Փաշինյանին։

Նիկոլ Փաշինյանը հայտարարեց, որ իրենց ռազմավարությունը ՀՀ-ի պետականությունը, ինքնիշխանությունը, անկախությունն ամրապնդելն է, իրենք շարունակելու են այս ճանապարհով։

Ըստ նրա,  որոշ ուժերի կողմից երկար տարիներ Լեռնային Ղարաբաղի հարցը օգտագործվել է մի նպատակի համար՝  «որպեսզի ՀՀ-ում պետություն չկայանա». «Այդ համոզմունքն  ինձ համար գնալով ավելի է խորանում։ Ես հայտարարել եմ, որ, ըստ էության,  1996 թվականի  Լիսաբոնի  գագաթնաժողովից հետո Լեռային Ղարաբաղի հարց չի եղել։ Մենք չենք  առերեսվել այդ իրականության հետ»։

Ս. Օհանյանն ասաց. «Իմ հարցին չպատասխանելով՝ փորձում եք շեղել։ Նախկին ժամանակահատվածում Արցախը գոյություն է ունեցել։ Ինչ էլ ուզում եք ասել՝ միևնույնն է, ձեր իշխանության ժամանակահատվածում է  Արցախը հայաթափվել, բանակցություններն ընդհատվել են, քանի որ իրարամերժ  հայտարարություններ ու գործողություններ եք արել, այսօր նորից ոչ մի բան չեք ձեռնարկում Արցախի պատմական մեր տարածքը հետ բերելու,  գոնե այդ ուղղությամբ բանակցելու համար»։ 

Փաշինյանն արձագանքեց. «Որպես Հայաստանի վարչապետ՝ իմ խնդիրը Հայաստանի ապագան է, իմ լիազորություննների շրջանակը ՀՀ Սահմանադրությունը ինձ տալիս է պատասխանատվություն ՀՀ ապագայի վերաբերյալ, ես կենտրոնացված եմ այդ խնդրի վրա։

Ինչ վերաբերում է դիտարիմանը, թե մենք Ղարաբաղին մենակ ենք թողել ինչ որ իրավիճակում... Նման արձագանքներին կարող եմ մեկ բառով գնահատական տալ՝ ե-րախ-տա-մո-ռու-թյուն, ուրիշ բառ ես պարզապես չեմ կարող օգտագործել։

Գերիների հնարավոր վերադարձի համար  արվում է ամենօրյա աշխատանք»։