Ձեր վստահելի աղբյուրը

Արարատի մարզի Սուրենավան գյուղում շների հարձակման հետևանքով մահացած երեխան՝ 7-ամյա Ալիկն է։ Դպրոցի փոխտնօրեն Վալյա Ավետիսյանը «Փաստինֆոյի» հետ զրույցում պատմել է, որ դեպքը առավոտյան է տեղի ունեցել՝ դպրոց գնալու ճանապարհին։

«Երևի 8.40 -ի սահմաններում իմացանք դեպքի մասին։ Դպրոցի ճանապարհին՝ ակումբի մոտ, շները հավաքված են եղել, թափառող շներ են այնտեղ պտտվում, որտեղ չկան դրանք։ Առավոտ շուտ տղան իր ընկերների հետ՝ 3-ով, դպրոց գնալիս են եղել, երբ շները հարձակվել են։ Երեխաները վազել են։ Ալիկը վազելիս ընկել է, սկզբում կարծում էինք, որ գլուխն է քարին կպել, բայց փաստորեն սիրտն է ճաքել վախից»,-պատմել է դպրոցի փոխտնօրենը։

Նա նաև նշել է, որ երեխայի մայրը նույն դպրոցում է աշխատում.«Իմ աշակերտուհին է եղել, հիմա դպրոցի գործավարուհին է։ Բոլորս շատ ճնշված ենք, ուղղակի խոսելն անհնար է»։

Panorama.am-ի հետ զրույցում ավելի վաղ Արարատ ԲԿ-ից հայտնեցին, որ երեխան մահացած է տեղափոխվել իրենց մոտ։

«Հիվանդանոց չի տեղափոխվել, այլ դիահերձարան»,-ասացին ԲԿ-ից։

Կենտրոնից մահվան հստակ պատճառ չեն նշում՝ խորհուրդ տալով սպասել դատաբժշկական փոձաքննության արդյունքներին։

Ոստիկանությունից Panorama.am-ին հայտնեցին՝ ստացել են հաղորդում, որ Սուրենավանում 7-ամյա երեխա է մահացել։ Ստեղծվել է օպերատիվ քննչական խումբ, դեպքով քննչական կոմիտեն է զբաղվում։

ՔԿ-ից Panorama.am-ին հայտնեցին, որ դեպքի վերաբերյալ տեղեկատվություն կարող են տրամադրել ավելի ուշ։