Ձեր վստահելի աղբյուրը

«Այս կառավարությունը ձախողելով երկրի կառավարումը, բերելով հազարավոր զոհեր, հսկայական տարածքային կորուստներ անընդհատ  խոսում է ժողովրդավարությունից։ Ժողովրդավարությունը լավ է, պետք է ձգտել դրան»,-Ազգային ժողովում կառավարության հետ հարցուպատասխանի ժամանակ ասաց «Հայաստան» խմբակցության պատգամավոր Լևոն Քոչարյանը։

Այնուհետև դիմելով կառավարությանը՝ հարցրեց. «Այն ժողովրդավար երկրները, որոնց ձգտում եք հասնել, ուսումնասիրե՞լ եք արդյոք, թե քանի հոգի է  կալանավորված ֆեյսբուքյան գրառման համար, քանի հոգի է հետապնդվում այլակարծության համար։ Եթե սա լիներ ընդհանուր մոտեցում,  միգուցե լիներ հասկանալի, բայց հստակ տեսնում ենք, որ այստեղ կա  տարբերակված մոտեցում։ Այդ ամենն աշխատում է, երբ որ մարդ խոսում է կառավարության, իշխանության դեմ, իսկ երբ հակառակն է լինում,  որևէ մեկը չի հերքի, որ հակառակը լինում է, կան շատ օրինակներ, բայց ընթացք չեն ունենում, կամ եզակի դեպքերում, գուցե ձևական, որոնք հետագայում կոծկվում են»։

Հարցին պատասխանեց Նիկոլ Փաշինյանը. «Մենք, բնականաբար, չենք կարող բոլոր երկրների վիճակագրությանը հետևել։ Բայց մենք կարող ենք համեմատել  Հայաստանի նախկին  շրջանի վիճակագրության հետ։ Կարող ենք ասել, օրինակ, քաղաքական գործիչները պադեզդներում  չեն սպանվում, ժողովրդի վրա չեն կրակում, ընտրությունները չեն կեղծում, սրա-նրա հետ բիզնեսում փայ չեն մտնում, Եռաբլուրի հողամասերը չեն սեփականաշնորհում։

Ինչ վերաբերում է  միջազգային վիճակագրությանը, մենք հետևում ենք միջազգային կազմակերպությունների զեկույցներին, որոնք  5 տարի շարունակաբար արձանագրում են Հայաստանի առաջընթացը ժողովրդավարության ոլորտում։

Համարո՞ւմ ենք, որ մեր ժողովրդավարությունն անթերի է,  հասել ենք մեր երազած ժողովրդավարությանը։ Ոչ, այդպես չենք համարում, այսօր անդրադարձել եմ արդարադատության ոլորտի մեր պրոբլեմներին, նաև չեմ կարող  չընդգծել, որ հսկայածավալ  բարեփոխումներ ենք իրականացրել։ Կասկած չունեմ, որ մենք անկախ դատական համակարգի, արդարության, արդարադատության մեր  իդեալին հասնելու ենք»։

Լևոն Քոչարյանն արձագանքեց. «Չե՞ք հոգնել համեմատություններ անելուց, հիմա հետ գնանք, մինչև Ստալին հասնե՞նք, որ մարդկանց էին գնդակահարում։ Ո՞ր հարց եմ տալիս, փորձեք կոնկրետ պատասխանել։ Ես խոսում եմ շատ կոնկրետ երկակի ստանդարտների մասին։ Օրինակ, ես կարող եմ  խոսել վարչապետի ավտոշարասյունը հղի կնոջ է գցում մեքենայի տակ ու «լայաղ» չի անում կանգնի: Ես այդ դաշտ չեմ մտնում,  երկակի ստանդարտների մասին եմ հարց տալիս, որը  շատ ակնառու է ու ակնհայտ։ Իսկ արդարադատության հետ կապված` խնդրում եմ, մի ծիծաղացրեք, տեսնում ենք` ինչ է կատարվում»։ 

Նիկոլ Փաշինյանն ասաց. «Իհարկե, իրավունք ունեն հիշել  Լեո-Պարոնյան փողոցի խաչմերուկում տեղի ունեցած միջադեպը նրանք, ովքեր «Առագաստ» սրճարանում ծեծելով սպանել են ՀՅԴ անդամ Պողոս Պողոսյանին:

Ինչ վերաբերում է իմ հոգնությանը... Սահմանադրական իմ պարտականությունն է պատասխանել պատգամավորների հարցերին, ես նաև  չեմ հոգնում ձեր հարցերին պատասխանելիս, դրանք շատ մեծ օգուտներ են բերում»։