![](https://panorama.am/news_images/980/2937187_1/panorama_01_26_55_08_still815.thumb.jpg)
ԱՄՆ ՄԶԳ-ն Հայաստանում մեկնարկեց 25 միլիոն ԱՄՆ դոլար բյուջեով տնտեսական ծրագիրը
Դեկտեմբերի 8-ին Երևանում պաշտոնապես մեկնարկեց ԱՄՆ Միջազգային զարգացման գործակալության շուրջ 25 միլիոն ԱՄՆ դոլար բյուջեով «Տնտեսական հիմքեր՝ հանուն դիմակայուն Հայաստանի» ծրագիրը։
«Այս ծրագրի շրջանակներում մեր հետապնդած ամենակարևոր նպատակը մասնավոր հատվածի, հասարակության և կառավարության համատեղ աշխատանքն է, միմյանց հետ աշխատելու և տնտեսական հնարավորությունների ուսումնասիրելու պայմաններ ստեղծելը»,-ճեպազրույցում հայտնեց ԱՄՆ Միջազգային զարգացման գործակալության հայաստանյան առաքելության տնօրեն Ջոն Ալելոն։
Նրա խոսքով, այդ նպատակով տարբեր ծրագրե են իրականացվում և թիրախը ֆինանսական ներդրումները ներգրավելու և Հայաստանում օգտագործելու արդյունավետության բարձրացումն է։
Ջոն Ալելոն հայտնեց, որ հիմնականում աշխատելու են այն ոլորտներում որոնք Հայաստանի համար առաջնայնություն են ներկայացնում՝ գյուղատնտեսության, զբոսաշրջության և տեխոնոլոգիաների հատվածները։
Հարցին թե ծրագրում դիտարկված են Արցախից բռնագաղթածների խնդիրները՝ ԱՄՆ Միջազգային զարգացման գործակալության հայաստանյան առաքելության տնօրենն ասաց. «Մեր ղեկավարած ծրագրերը որոշակի ճկունություն ունեն և կարող են արձագանքել առաջացող մարտահրավերներին և կարիքներին։ Երբ ԼՂ-ից տեղահանված անձիքն ժամանեցին Հայաստան, 60 օրվա ընթացքում կազմակերպվեց մի ծրագիր և մոտ 30 հոգի հնարավորություն ստացան մեկ ամսվա ընթացքում վերապատրաստում անցնել և իրազեկվել, թե Հայաստանում ինչ հնարավորություններ կան աշխատուժի առումովր և այն շատ կարևոր է բոլոր տեղահանվածների համար»։
Միջոցառման մեկնարկային խոսքով Ալելոն ասաց «ԱՄՆ կառավարությունը, ԱՄՆ Միջազգային զարգացման գործակալության միջոցով, հանձնառու է աջակցել Հայաստանի տնտեսական աճին։ Դա ներառում է մասնավոր հատվածի հետ գործընկերության հաստատում՝ ներդրումներ, տեխնոլոգիաներ և գիտելիք ներգրավելու համար, ինչպես նաև գործարար միջավայրի բարելավում, ներդրումային խթանների տրամադրում և տնտեսական զարգացման քաղաքականությունների մշակում։ «Տնտեսական հիմքեր՝ հանուն դիմակայուն Հայաստանի» ծրագիրն իր գործունեությունը չի սկսում զրոյից։ ԱՄՆ ՄԶԳ-ն հիմնվում է տնտեսական կառավարման, զբոսաշրջության, գյուղատնտեսության և բարձր տեխնոլոգիաների բնագավառներում տրամադրած իր նախկին և ընթացիկ աջակցության վրա՝ ամրապնդելու ավելի դիմակայուն Հայաստան ունենալու մեր ջանքերը»։
Նրա խոսքով՝ ծրագիրը հասցեական նախաձեռնությունների միջոցով տեխնիկական աջակցություն է տրամադրելու կառավարությանը, աշխատելու է զբոսաշրջության, գյուղատնտեսության և բարձր տեխնոլոգիաների ոլորտներում մասնավոր հատվածի ընկերությունների և սոցիացիաների հետ։
Իր ելույթում ՀՀ էկոնոմիկայի նախարար Վահան Քերոբյանն ասաց. «Մեր հիմնական նպատակը Հայաստանի տնտեսության դիվերսիֆիկացումն է և այդ ուղղությամբ կամաց-կամաց տեսնում ենք դրական միտումներ»:
Նա ասաց, որ տնտեսության դիվերսիֆիկացումը չպետք է լինի որևէ երկրի հաշվին, բայց խնդիր է դրված, որ որևէ երկիր չունենա գերակշռեղ ազդեցություն Հայաստանի տնտեսության վրա:
«Ծրագրի հիմնական նպատակն է ներդրումներ անել ներդրումային միջավայրի բարելավման նպատակով»,-ասաց Քերոբյանը՝ պարզաբանելով, որ անհրաժեշտություն կա բարձրացնել և մասնավոր ոլորտի և պետական կառույցների աշխատանքի արդյունավետությունը, այդ թվում նաև Էկոնոմիկայի նախարարությունում, որի աշխատանքից դժգոհ է նաև ինքը։
ԱՄՆ Միջազգային զարգացման գործակալության կողմից ֆինանսավորվող այս ծրագրի նպատակն է աջակցել Հայաստանի տնտեսական դիմակայունության ամրապնդմանը, զարգացնել մրցունակությունն ու բարելավել տնտեսական կառավարումը՝ պետական և մասնավոր հատվածների հետ սերտ համագործակցության միջոցով։ Ծրագրի արդյունքում ակնկալվում է նպաստել նվազագույնը 60 միլիոն ԱՄՆ դոլար ընդհանուր ծավալով ներդրումների մոբիլիզացիային՝ «Ներդրումային մոբիլիզացման հարթակի» մշակման և ներդրման միջոցով, ինչպես նաև հնարավոր դարձնել 750 ընկերությունների վաճառքների աճը։
«Տնտեսական հիմքեր՝ հանուն դիմակայուն Հայաստանի» ծրագրի նպատակներից է նաև նպաստել գործարար և ներդրումային միջավայրի բարելավմանը՝ առանցքային իրավական փաստաթղթերի մշակման աշխատանքներին օժանդակություն ցուցաբերելու միջոցով։
«Մենք ակնկալում ենք, որ ծրագիրը կյանքի կկոչի նորարարական, կայուն և համակարգային լուծումներ և կզարգացնի միջոլորտային փոխգործակցությունը՝ նպաստելով Հայաստանի տնտեսական քաղաքականության արդյունավետության բարձրացմանը, արտահանման մրցունակության ամրապնդմանը և ֆինանսական կապիտալի արդյունավետ օգտագործմանը»,-իր ողջույնի խոսքում ասաց ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը։ Ծրագիրը չորս փոխլրացնող նպատակ է հետապնդում՝ բարելավել պետական գործընկեր կառույցների ինստիտուցիոնալ և մարդկային կարողությունները, զարգացնել թիրախային ոլորտների արտահանման ներուժն ու մրցունակությունը, խթանել կատալիտիկ ներդրումները և աջակցել Հայաստանին՝ հաղթահարելու տնտեսական ցնցումներն ու օգտվելու ի հայտ եկող հնարավորություններից։
Հարակից հրապարակումներ`
- ԱՄՆ ՄԶԳ. 4.1 միլիոն դոլար լրացուցիչ մարդասիրական օգնություն՝ ԼՂ-ից տարհանված անձանց
- ԱՄՆ մի շարք քրիստոնեական համայնքների առաջնորդներ Արցախի հարցով նամակ են ուղարկել Ջո Բայդենին
- ԱՄՆ ՄԶԳ-ն կշարունակի իր համագործակցությունը ՀՀ Ազգային Ժողովի հետ
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան