Ձեր վստահելի աղբյուրը

 Ձկնաբույծները բողոքում են օրենսդրական փոփոխություններից, ըստ որի՝ Հայաստանի ձկնաբուծական տնտեսությունները, որոնք ջուր են ստանում ստորգետնյա հորատանցքերից, պետք է օգտագործեն միայն ջրի շրջանառության խնայող համակարգեր։ Տևական ժամանակ է բողոքի ակցիաներ են իրականացնում, սակայն արդյունքները գնահատում են ոչ բավարար։ Ամեն դեպքում, օրենսդրական փոփոխությունները, ուժի մեջ կմտնեն 2024թ․-ի հունվարի մեկից։ Ենթադրվում է, որ խստացումները կօգնեն  մեղմել  Արարատյան դաշտի ջրահավաք ավազանի հետ կապված խնդիրները։

Panorama.am-ը զրուցեց տեխնիկական գիտությունների թեկնածու, Հայաստանի ջրային կոմիտեի նախկին նախագահ  Ինեսսա Գաբայանի հետ, որի խոսքով, հաշվի առնելով Արարատյան դաշտի ջրահավաք ավազանի շուրջ ստեղծված խնդիրը,  որոշակի քայլեր ձեռնարկելն անհրաժեշտություն է։

«Կառավարության դիմաց ձկնաբույծները բողոքում են,թե իբև փակվում են։ Կարծում եմ՝ այս ամենը նախապատրաստված է հենց սեփականատերերի կողմից, իրենց աշխատողների միջոցով  բողոքի ակցիաներ են կազմակերպում։ Նրանք պարզապես փորձում են իրենց պատասխանատվությունից խուսափել»,- ասաց Գաբայանը։

Նրա համոզմամբ՝ օրենսդրական փոփոխությունները պետք է իրականացնել։

«Միանշանակ պետք են օրենսդրական փոփոխություններ և որոշումներ։ Նախագծում գրված է, որ ֆինանսական լրացուցիչ ներդրումներ չեն պահանջվելու, սակայն ես կարծում եմ, որ պահանջվելու են՝ Արարատյան դաշտում կարգի բերելու  ժամանակին հորված ինքնաշատրվանող հորերը փականելու, վերացնելու և այլն։ Այս հարցերը պետք է առաջ տանել, ժողովուրդը պետք է հասկանա, որ ոչ թե իրենց աշխատանքի դեմ է, այլ ոլորտը բարելավելու։ Սա և՛ ներկայի, և՛ մոտ ապագայի  ռազմավարական, առողջապահական և կյանքի հրատապ խնդիր է»,- կարծիք հայտնեց  Ինեսսա Գաբայանը։

Թե որքանով այս օրենսդրական փոփոխությունները կծառայեն իրենց նպատակին և կլուծվի արդյոք արտեզյան ավազանի հյուծման խնդիրը, ցույց կտա ժամանակը։

Հիշեցնենք, որ Panorama.am-ը վերջերս անդրադարձ կատարել է  Արարատյան դաշտի ստորերկրյա ջրավազանի խնդրին։  Մասնագետները նշեցին, որ Արարատյան դաշտի ստորերկրյա ջրավազանը խիստ հյուծված վիճակում է և հիմնական պատճառներից  մեկը՝ վերջին 10-15 տարվա ընթացքում ձկնաբուծարանների ինտեսիվ զարգացումն է։ Նրա ուսումնասիրությամբ,որը կատարվել է 2016թ․-ին, արդյունահանվում էր մոտավորապես 1 մլդ 600 մլն խմ ջուր, այսինքն՝ 700 մլն-ով ավելին, քան թույլատրելի չափն էր։

Ավելի մանրամասն կարող եք կարդալ այստեղ։