Ձեր վստահելի աղբյուրը

Հայաստանի և Ադրբեջանի միջև գերիների փոխանակման շուրջ պայմանավորվածության իրականացումից հետո անգամ այդ երկրում դեռևս հայ գերիներ կմնան: Այս մասին ասել է ՀՀ ԱԺ նախագահ Ալեն Սիմոնյանը Հայաստանում Կանադայի արտակարգ և  լիազոր դեսպան Էնդրյու Թըրների հետ հանդիպմանը:

ՀՀ ԱԺ հաղորդմամբ, անդրադառնալով տարածաշրջանային մարտահրավերներին՝ Ա.Սիմոնյանն ընդգծել է. «Մենք հասկանում ենք, որ մեր անվտանգության առանցքային համակարգը ժողովրդավարությունն է: Լիահույս ենք, որ միջազգային գործընկերները կաջակցեն ժողովրդավար Հայաստանին տարածաշրջանում երկարատեւ խաղաղություն հաստատելու գործում»: Այս համատեքստում խորհրդարանի ղեկավարը դեսպանին ներկայացրել է Ադրբեջանի հետ խաղաղության պայմանագրի կնքման գործընթացը, անդրադարձել Ադրբեջանում գտնվող գերիների անհապաղ վերադարձին: 

Դեսպանը հետագա համագործակցության պատրաստակամություն է հայտնել, նշել, որ Կանադան աջակցում է Հայաստանի տարածքային ամբողջականությանը, ինքնիշխանությանը եւ ժողովրդավարությանը: Նրա խոսքով, Կանադայի արտգործնախարարի այցը Հայաստան և դեսպանության բացումը Հայաստանի ժողովրդավարությանն աջակցելու եւս մեկ ապացույց են: