Ձեր վստահելի աղբյուրը

«Դրանցից 3-ին անդրադառնամ, որպես խոշոր հատկացումների, որոնք միասին 4.8 մլրդ դրամ են կազմում: Դրանց մոտ 4 մլրդ-ը՝ 3 միլիարդ 993 միլիոնը, սուբվենցիոն ծրագրերի համար է, 643 մլն դրամ տրամադրում ենք մարզերին՝ բռնի տեղահանված մեր հայրենակիցների հետ կապված մի շարք ծախսեր իրականացնելու համար»,-կառավարության նիստում հայտնեց ՏԿԵ նախարար Գնել Սանոսյանը՝ ներկայացնելով հերթական սուբվենցիոն ծրագրեի համաֆինանսավորման համար հատկացվող պետական միջոցների վերաբաշխման նախագիծը։

Նախարարաը տեղեկացրեց, որ Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզպետների աշխատակազմերին որոշակի հրատապ ծրագրեր իրականացնելու համար նաև կհատկացվի 160 մլն դրամ:

«Նախագծով ամենախոշոր հատկացումը՝ մոտ 4 մլրդ, վերաբերում է սուբվենցիաներին,  և ըստ մարզերի՝ բաշխվածությունը հետևյալն է. Արագածոտնի մարզին կտրամադրենք 390 մլն, Արարատի մարզին՝ 483 մլն դրամ, Արմավիրին՝ 88 մլն դրամ, Գեղարքունիքին՝ 218 մլն դրամ, Լոռու մարզին՝ 295 մլն դրամ, Կոտայքին՝ 647 մլն դրամ, Շիրակի մարզին՝ 372 մլն դրամ, Սյունիքին՝ 660 մլն դրամ, Վայոց ձորին՝ 16 մլն դրամ, Տավուշին՝ 820 մլն դրամ»,- հայտնեց Սանոսյանը:

Հիշեցնելով, որ  ներկայացվողը տարվա վերջին սուբվենցիոն փաթեթն է՝ ՏԿԵ նախարարը ասաց, թե կան ծրագրեր, որոնք ավարտական փուլում են, բայց դրանց դիմաց կառավարությունն արդեն հունվար-փետրվար ամիսներին կվճարի։

«Այս հատկացումով Կառավարության մասնաբաժինը մոտ 31-մլրդ-ի հասավ: Այս տարի ծրագրերի մեջ գերակշռել են ասֆալտապատման ծրագրերը, ընդհանուր իրականացրել ենք 446 ծրագիր, և ասֆալտապատման ծրագրերը գերակշռող են եղել: Գերակշող են ջրագծերը և մանկապարտեզները, ասֆալտապատվել և սալարկվել է մոտ 250 կմ համայնքային ճանապարհ»,-հայտնեց Գնել Սանոսյանը:
 

Նիկոլ Փաշինյանն էլ ընթերցեց բոլոր համաֆինանսավորվող ծրագրերը։