Ձեր վստահելի աղբյուրը

Հայ-ռուսական ապրանքաշրջանառությունը հունվար-սեպտեմբերին աճել է 43,5%-ով և հասել 4,4 մլրդ դոլարի։ «ՌԻԱ նովոստի»-ն հայտնում է, որ այդ մասին ուրբաթ օրն ասել է ՌԴ փոխվարչապետ Ալեքսեյ Օվերչուկը։

«Ռուսաստանը Հայաստանի առաջատար առևտրային գործընկերն է, 2023 թվականի ինն ամիսներին մենք 43,5%-ով գերազանցել ենք նախորդ տարվա ցուցանիշները և հասել 4,4 մլրդ ԱՄՆ դոլարի ծավալի։ Ավելին, մենք այժմ փաստացի հավասարության ենք հասել մեր առևտրում»,- Երևանում տեղի ունեցած տնտեսական համագործակցության հայ-ռուսական միջկառավարական հանձնաժողովի 22-րդ նիստի ժամանակ ասել է Օվերչուկը։

Նա հիշեցրել է, որ ուրբաթ օրը Երևանում բացվել է Ռուսաստանի արտահանման կենտրոնի ներկայացուցչությունը։

«Վերջին մեկ տարում կենտրոնի աջակցությամբ կազմակերպվել և իրականացվել են 18 տարածաշրջանային բիզնես առաքելություններ... 10 ամիսների ընթացքում  կենտրոնի աջակցության խումբը, որպես հայկական շուկա արտահանման խթանման աշխատանքների մաս, ֆինանսական աջակցություն է ցուցաբերել 304 ինքնատիպ արտահանողների՝ 507 գործարքներում»,-նշել է ՌԴ փոխվարչապետը։

Նրա խոսքով, Ռուսաստանը շարունակում է զարգացնել ներդրումային համագործակցությունը Հայաստանի հետ։

«Այստեղ գործում են մոտ 40 խոշոր ռուսական ընկերություններ, որոնցից մի քանիսը երկրի խոշորագույն հարկատուներն են»,-ասել է Օվերչուկը՝ հավելելով, որ համագործակցությունը ֆինանսական և բանկային ոլորտում զարգանում է։

«Ցանկանում եմ նշել, որ 2023 թվականի հունվար-սեպտեմբերին Ռուսաստանի և Հայաստանի միջև ընդհանուր հաշվարկներում ռուսական ռուբլու մասնաբաժինը կազմել է 90,3 %»,-ասել է նա։
Նրա խոսքով, երկկողմ համագործակցության ամենադինամիկ զարգացող ուղղություններից մեկը զբոսաշրջությունն է։

«2023 թվականի հունվարից սեպտեմբեր ընկած ժամանակահատվածում Հայաստանից դեպի Ռուսաստանի Դաշնություն է կատարվել 269 հազար զբոսաշրջային ուղևորություն, իսկ մեր տվյալներով՝ Հայաստան է եկել 843 հազար ռուս զբոսաշրջիկ»,-ասել է Օվերչուկը։