Ձեր վստահելի աղբյուրը

«Ժողովուրդ» թերթը գրում է.

«ՀՀ վիճակագրական կոմիտեն ներկայացնում է, որ 2022 թվականի ընթացքում Հայաստանի Հանրապետությունից ապաստան հայցող անձանց քանակը կազմել է 950 մարդ։ Տեղեկացնենք, որ ՀՀ-ից ապաստան հայցողների մեծ մասը Ուկրաինայից են՝ 472 անձ, 199-ը Իրաքից են, 101-ը Իրանից են։

Հայաստանից ապաստան խնդրողներն այն երկրներից են, որտեղ այժմ ոչ խաղաղ կամ պատերազմական իրավիճակներ են։ Ռուսաստանի Դաշնության միայն 18 քաղաքացի է դիմել ՀՀ ապաստան հայցելու նպատակով։

Հայաստանում, հատկապես՝ Երևանում, երբ ամեն քայլափոխին ռուսներ են և ռուսներին պատկանող սրճարաններ կամ այլ սպասարկման կետեր, զարմանալի է՝ նման քիչ թվով են դիմել ապաստան հայցելու: Այս փաստերին զուգահեռ՝ Հայաստանից կացության կարգավիճակ է ստացել 6 հազար 106 օտարերկրացի։ Հայաստան եկածների, ապաստան խնդրածների և կացության կարգավիճակ ստացածների քանակական տվյալները ակնհայտ են, սակայն 2023 թվականի սեպտեմբերի 19-ից հետո Հայաստանից արտագաղթած անձանց տվյալներ չկան։

«Ժողովուրդ» օրաթերթը տեղեկություններ ունի, որ Արցախից բռնի տեղահանված քաղաքացիները դիմել են ՀՀ-ում Ֆրանսիայի, Ռուսաստանի և այլ դեսպանատներ՝ ապաստան հայցելով: Հավելենք նաև, որ Նիկոլ Փաշինյանն հենց ինքն էր մեկ ամիս առաջ կառավարության նիստում հայտարարել, որ արցախցիները արտագաղթել են Հայաստանից։ «Այսօրվա դրությամբ ունենք Լեռնային Ղարաբաղից բռնի տեղահանված ավելի քան 3000 անձինք, ովքեր Հայաստանի Հանրապետությունից դուրս են եկել, և ես չեմ ուզում հետևություններ անել՝ այս թեմայի հետ կապված»»։

Մանրամասները թերթի այսօրվա համարում։