Ձեր վստահելի աղբյուրը

ԳԱԱ Պատմության ինստիտուտի Միջին դարերի պատմության բաժնի  գիտնականները 31 էջից բաղկացած ընդգրկուն նկատառումներ են ներկայացրել  Սմբատ Հովհաննիսյանի հեղինակած «Հայոց պատմություն» 7-րդ դասարանի դասագրքի վերաբերյալ։

Նախ նշվում է, որ դասագիրքը բավականին բարդ է 7-րդ դասարանի սովորողների համար, որոնք դժվարությամբ են ընկալում նոր ուսումնասիրվող առարկայի բարդ տերմինները, հստակ չեն պատկերացնում պահանջվող առաջադրանքները, յուրացվող նյութի անհարթ ու բարդ ձևակերպումները, որոնք առկա են դասագրքում: Դասագրքի մեթոդական մասը, հարցադրումները, իրենց տարբեր մակարդակներով, բավականին բարդ են, կարելի էր նույն մեթոդաբանությամբ առավել պարզ նախադասություններ ու ձևակերպումներ կազմել: Պակաս կարևոր չէ նաև այն, որ դասագրքի տպագրական որակը բավականին ցածր է, տեքստի ընթեռնելիությունը՝ դժվար, քանի որ շատ բաց երանգով են տպագրված տեքստերը:

Նրանք առանձնացրել են պարզաբանման, հստակեցման ու լրացման կարիք ունեցող և վիճելի, անհաջող ձևակերպումներն ու մտքերը։ 

Որպես սխալ ձևակերպում նշված է. «Հայկական լեռնաշխարհի բացատրության մեջ Փոքրասիականին զուգահեռ՝ «Անատոլիական» բարձրավանդակ թուրքական տերմինի առկայությունը»,

Հեղինակը Հայ Առաքելական եկեղեցու հիմնադիր է համարում Տրդատ Գ Մեծ (298–330) արքան (էջ 111): Հայ առաքելական եկեղեցին առաքալահիմն է, ուստի Տրդատ Գ-ը չի կարող նրա հիմնադիրը լինել: Կարծում ենք, որ այս ձևակերպման մեջ բովանդակային, պատմագիտական անճշտություն կա։ Եկեղեցին, ինչպես Հայաստանում, այնպես էլ Հռոմեական կայսրությունում հոգևոր հաստատություն
էր/է և այն, ըստ էության, չէր կարող հիմնադրել աշխարհիկ իշխանության ներկայացուցիչը, այն է՝ Տրդատ III-ը կամ Հռոմի կայսրը»։

Գիտնականները իրենց նկատառումները ներկայացնելու հետո որպես եզրակացություն նշել են. «Հաշվի առնելով վերոնշյալը, կարծում ենք, որ դասագիրքն ունի վերանայման կարիք և նման բովանդակությամբ չի կարելի դասավանդել դպրոցում»։