Ձեր վստահելի աղբյուրը

«Արա Մարտիրոսյանը յուրահատուկ ձեռագիր ուներ, իր ձայնային խռպոտ տեմբրը․․․ բոլորիս ցավակցում եմ՝ մեծ երգիչ կորցրեցինք»,- Մարտիրոսյանի հոգեհանգստի արարողությունից հետո լրագրողների հետ զրույցում ասաց նրա ընկեր, դուդուկահար Կամո Սեյրանյանը։

Հարցին,թե ի՞նչն էր անհանգստացում Մարտիրոսյանին,Սեյրանյանն ասաց․ «Գիտենք, որ Արա Մարտիրոսյանն ուներ սրտի հետ կապված խնդիրներ։ Ուներ 6 ստենտ սրտի մեջ դրված։ Շրջագայությունների ժամանակ շատ  գանգատվում էր առողջական խնդիրներից, նևրոզ ուներ, հաճախ ասում էինք՝ դու քո շուքի հետ էլ յոլա չես գնում»։

Նա նշեց, որ Մարտիրոսյանը նաև ծանր է տարել մայրիկի մահը։
«Վերջերս Արայենց տանը իր հայրիկի հետ զրուցելիս ասում էր՝ անհամբեր սպասում է,թե երբ է այս քառասուն օրն անցնելու»,- պատմեց նա։

Նշենք, որ Կոնդի Սուրբ Հովհաննես Մկրտիչ եկեղեցում տեղի է ունենում երգիչ Արա Մարտիրոսյանի հոգեհանգիստը։ Հայտնի երգիչները, հարազատները և երկրպագուները հրաժեշտ են տալիս սիրված երգչին։

Արտիստի վերջին հրաժեշտի արարողությունը տեղի կունենա դեկտեմբերի 20-ին, ժամը 11:30-ից 13:30 Արամ Խաչատրյան համերգասրահից։

Ավելի  վաղ հայտնել էինք, որ դեկտեմբերի 16-ին կյանքից անժամանակ հեռացել է սիրված երգիչ Արա Մարտիրոսյանը։ Երգչի ընկերները Panorama.am-ին հայտնեցին, որ նրա մոտ գրանցվել է սրտի կանգ։  Բժիշկները ժամեր շարունակ պայքարել են արտիստի կյանքը փրկելու համար, սակայն գրանցվել է սրտի կանգ: