Ձեր վստահելի աղբյուրը

«Մեզ մեղադրում են, որ մենք վաճառել ենք, հանձնել ենք, դա խորքում նշանակում է, որ մենք ջանքեր չենք գործադրել, որ պահպանենք ՀՀ կամ ԼՂ իրավունքը, և այդպես շարունակ»,-Հանրային հեռուստաընկերությանը տված հարցազրույցում ասաց Նիկոլ Փաշինյանը:

Նրա խոսքով՝ օբյեկտիվության հետ սահմանակցող մեղադրանքը պետք է այլ լինի:

«Այն է, որ մենք ժողովրդի հետ չենք խոսել ԼՂ հարցում մեր պատկերացումների, նկատի ունեմ` հայկական պատկերացումների և ցանկությունների իրականացման անհնարինության համար: Մեզ մեղադրում են մի բանում, որում մեղավոր չենք, մեզ չեն մեղադրում նրանում, որում ավելի հավանական է, որ մեր մեղավորությունը կհիմնավորվի` ինչո՞ւ, քանի որ այս դեպքում մեղադրանքը ավելի կլղոզվի, պարզ կդառնա, որ այդտեղ մեղադրանքն անձնավորելը, հասցեականացնելը շատ ավելի բարդ է»,-ասաց Փաշինյանը:

Նա հայտնեց, որ  այդ անհնարինության արձանագրումն անելը որոշակի գործընթաց է, այն քաղաքական է, գիտակցական, ենթագիտակցական, էմոցիոնալ, աշխարհաքաղաքական, տարածաշրջանային և այնպես չի եղել, որ եկել են իշխանության և արձանագրումն արել են:

Պատասխանելով հարցին, թե ինչո՞ւ այդ մասին նախկինում չի ասվել՝ Նիկոլ Փաշինյանը նշեց.«Շատ պարզ պատճառով, քանի որ նաև կառավարության, իշխանության, որևէ քաղաքական ուժի համար` ասելու համար` սա, սա չլինող է, պետք է անել նաև առաջարկ, ու դրա անհնարինությունն է, որ մեզ դրել է իրավիճակի առաջ, ընդ որում` դա միայն այն մասին չէ, որ արդյունքում նեգատիվ պրոցեսներ կսկսեն ՀՀ համար: Եթե ելնենք իմաստուն քաղաքական գործչի տրամաբանությունից` 2019-ին իմաստուն քաղաքական գործչի արձանագրումը պետք է լիներ դա` 7 տարածքները վերադարձնել, ընթացիկ կարգավիճակը զրոյացնել` ինչու և ինչպես` հետագայում կասեմ, ԼՂ-ում պետք է հաստատվի հայ-ադրբեջանական համատեղ կառավարում, ԼՂ կարգավիճակի հարցի որոշակիացում չի լինելու այնքան, մինչև ադրբեջանցիները ԼՂ-ում լինեն մեծամասնություն, ու գալու էր հինգերորդ հարցը` լավ, էս ամեն ինչից հետո ի՞նչ է լինելու, Սև լճի, Սոթք-Խոզնավարի իրադարձությունները լինելո՞ւ են, թե՞չէ»:

Նրա խոսքով՝ հասարակությանը բացատրելու անհնարինությունը նրանով չի պայմանավորված եղել, որր նեգատիվ պրոցեսներ կսկսվեն Հայաստանում, անկայունություն կլինի:

«Սա չի խնդիրը, խնդիրն այն է, որ անձամբ ես, իշխանության ներկայացուցիչները, ՀՀ հազարավոր քաղաքացիներ խնդիր են ունեցել այդ ամենի ինչի հետ համակերպվելու հետ: Այնպես չէ, որ մենք ներքուստ հաշտվել ենք դրա հետ ու թաքցրել ենք հանրությունից: Ես ինքս չեմ հաշտվել դրա հետ, որովհետև դրա այլընտրանքը չի եղել: Հիմա պատկերացրեք, ասում ենք՝ սա է իրավիճակը, ժողովուրդ: Բայց առաջնորդի խնդիրն է առաջարկ ներկայացնելը»,-հայտնեց ՀՀ կառավարության ղեկավարը:

Նիկոլ Փաշինյանը հայտարարեց, որ ԼՂ խնդրի կարգավորման բանակցային գործընթացում երբեք չի եղել մի տարբերակ, որն առաջարկի ԼՂ խնդրի լուծում. «Բոլոր տարբերակները, որոնք եղել են սեղանի վրա, մադրիդյան սկզբունքներից ի վեր, ենթադրել են ԼՂ հարցի չլուծում: Միայն մի տարբերակ է եղել 1999-ին, որը ստորագրելու պարագայում կարելի էր ասել, որ ԼՂ հարցը լուծվել է. դա Մեղրիի և ԼՂ-ի փոխանակման տարբերակն էր: Այսինքն Մեղրին հանձնվում է Ադրբեջանին, ԼՂ-ն միացվում է Հայաստանին: Մնացած ոչ մի տարբերակով ԼՂ հարցի լուծում չկար: Դա հատուկ էր արված, որ ԼՂ հարցը որպես պահակ հնարավոր լինի պահել Հայաստանի գլխին: Գուցե նաև Ադրբեջանի գլխին:

Եվ սա, իմ ընկալմամբ, ինչ-որ առումով նաև հատուկ էր արված, որպեսզի ԼՂ հարցը, որպես մահակ միշտ հնարավոր լինի պահել Հայաստանի Հանրապետության գլխին: Չգիտեմ, գուցե, ոմանք մտածում էին նաև` Ադրբեջանի գլխին, բայց ես հիմա Հայաստանի մասին եմ խոսում»: