Ձեր վստահելի աղբյուրը

Կառավարության դիմաց բողոքի ակցիա էին կազմակերպել Արարատյան դաշտի խորքային ջրերից օգտվող ձկնաբույծները։ Նրանք պահանջում են հանդիպում Շրջակա միջավայրի նախարարի վերադասների՝ վարչապետի, փոխվարչապետերի, աշխատակազմի ղեկավարի հետ։

Ձկնաբույծներին ընդունել էր Վարչապետի աշխատակազմի նամակների բաժնի պետը և պայմանավորվածություն էր ձեռք բերվել հետագա հանդիպման վերաբերյալ։ Ընթացիկ տարում ընդունված օրենսդրական փոփոխությամբ ձկնաբույծներին պարտադրվում է 40%-ով կրճատել խորքային հորերից օգտագործվող ջրի քանակը։ Օրենքի կարգավորումն ուժի մեջ է մտնում 2024 թվականի հունվարի 1-ից, իսկ խախտումների համար մինչև 3 մլն դրամ տույժ է նախատեսվում։ Panorama.am-ին ակցիայի մասնակիցների պահանջները ներկայացրեց ձկնաբույծ Սերգեյ Դավթյանը։

«Մենք այսօր եկանք, դիմեցինք, որ մեզ կա՛մ վարչապետն ընդունի, կա՛մ փոխվարչապետը, քանի որ շրջակա միջավայրի նախարարի հետ ոնց խոսում ենք՝ չի ստացվում։

40%-ով օգտագործվող ջրի կրճատումը վատ հետևանքներ կառաջացնի, ձկանբուծարանները կսկսեն հերթով սննկանալ։ Կառավարությունն համարյա անհնար բան են ասում։

Նախկինում չէինք հավատում, որ ձկնաբուծարաններին նման պարտադրանքի տակ միտում կա, հիմա կամաց-կամաց սկսում ենք հասկանալ, որ մի բան կա, որ ասում են՝ ինչ էլ լինի՝ միևնույնն է ձեր 40 %-ը փակելու ենք։

Մենք ասում ենք, եկեք տիրազուրկ հորերը փակենք, որ որոշենք թե ճնշումն ինչքան է բարձրանում, ըստ այդմ փակենք ձկանբույծների օգտագործած ջուրը, հնարավոր է ոչ թե 40%, այլ  70% փակել։ Ասում են՝ ոչ, որոշված է ձկնաբույծների մոտ պետք է 40% փակվի»,- հայտնեց Սերգեյ Դավթյանը։