Ձեր վստահելի աղբյուրը

Հայաստանի դպրոցներում այս տարի աշակերտները մոտ 10 առարկա առանց դասագրքերի են սովորելու: Ի՞նչն է դասագրքերի բացակայության պատճառը և ի՞նչ նյութերով են ուսուցիչներն այդ առարկաները դասապատրաստում: Այդ հարցերի պատասխանը ստանալու համար Panorama.am-ը դիմեց ԵՊՀ դասախոս, կրթության փորձագետ Սերոբ Խաչատրյանին:

Ս. Խաչատրյան-Հետաքրքիրն այն է, որ բոլորը խոսում են 7-րդ դասարանի պատմության դասագրքի մասին, բայց ավելի լուրջ հիմնահարցն այն է, որ  մոտ  10-ը առարկայի դասագիրք ընդհանրապես չկա, սա ավելի մեծ խնդիր է: Իհարկե, նախարարությունը մեղքը գցում է հեղինակների վրա, ասում է՝ դե չեն դիմել, ես ինչ անեմ, եթե դի մող չի եղել, ես ինչ պետք է ընտրեի: Բայց կա նաև սրա հարցը, թե ինչո՞ւ չեն դիմել: Հայաստանի պատմության մեջ վերջին 20 տարում այդպիսի բան չէր եղել, որ դասագրքին չդիմեին: Նշանակում է ՝ պայմաններն այն չեն եղել:

Օրինակ ռուսերենի ոչ մի դասագիրք չկա՝ ո՛չ 2-րդ, ո՛չ 5-րդ, ո՛չ  7-րդ դասարանների: Լավ, Հայաստանում չկա՞ ռուսերենի դասխոս, ուսուցիչ, մեթոդիստ, որ դասագիրք գրեր, իհարկե կար, բայց ինչո՞ւ չեն գրել, այ սա է հարցը, որը, ցավոք, անտեսվեց, մնաց ստվերում:

Սա լուրջ խնդիր է, մի ամբողջ տարի մոտ 10-ն առարկա առանց դասագրքի սովորելու են: Գերմաներենի, ինֆորմատիկայի, «Իմ հայրենիք»-ը առարկայի և այլ գրքերը չկան:

Panorama.am-Իսկ այդ դեպքում ի՞նչ էլեկտրոնային տարբերակներ են վերոնշյալ առարկաների համար, որ ԿԳՄՍ նախարարությունը հայտարարում է, թե պետք է դրանցով սովորեն:

Ս. Խաչատրյան-Չափորոշիչները Տավուշի մարզում փորձարկել են, այն իրականացնելու համար նյութեր են մշակել՝ դասապլան, դասի նյուքեր: Նախարարությունն ասում է՝ այդ նյութերը ես ինտերնետում դրել եմ, գնացե՛ք, տպե՛ք, օգտագործե՛ք, մինչև գրքերը լինեն, բայց այն խնդրի լուծում չէ և կրթության որակի վրա լուրջ ազդեցություն կթողնի:

Զրուցեց՝ Արմեն Վարդանյանը