Ձեր վստահելի աղբյուրը

ՀՀԿ ԵԿ փոխնախագահ Աշոտ Անդրեասյանը «Ֆեսբուքի» ուղիղ եթերով ներկայացրեց կալանքի տակ գտնվող ՀՀԿ փոխնախագահ, քաղբանտարկյալ Արմեն Աշոտյանին ուղղված հարցերի պատասխանները։ Մի քանի հարցերի պատասխաններին անդրադարձել է  «Առավոտը»:

Օգտատեր Նունե Ամիրխանյանը հարցրել էր․ «Չորեքշաբթի օրվա ուղիղ եթերում Նիկոլն ասաց, որ անկանխատեսելի իրադարձությունների զարգացումներ են սպասվում ՀՀ-ին, և ոչ ոք ոչ կարող է ասել թե ինչ կլինի, ոչ էլ ինչ-որ մեկը մեղավոր է»։

Աշոտյանի պատասխանը հետևյալն է․ «Պատկերացրեք մի ավտոբուսի վարորդ, որի մեքենան техосмотр չի արել, վարորդական իրավունք չունի психо չունի, քշել չգիտի ու խմած է, թեքելով ավտոբուսը ձորը տանող արահետի ուղղությամբ, բարձրախոսով հայտարարի, որ՝ «ժողովուրդ ջան, ավտոբուսը կարա շուտով գլորվի, շրջվի, այրվի», բայց ինքը մեղավոր չէ։ Ի՞նչ կանեիք այս դեպքում։ Պարզ է, չէ՞, պատասխանը։ Նախ, պետք է շտապ փոխել վարորդին, որքան էլ նա դիմադրի, սպառնա, ավտոբուսի դռները փակի և այլն։ Իսկ փրկվելուց հետո արդեն վերջնական պարզել և պատժվել մեղավորին»։

Կարեն Վարդումյանը հարցրել է․ «Դավաճանն ասաց, որ նախկինում թե՛ դիվանագիտական հաջողությունները , թե՛ ռազմական բոլորինս են, իսկ հիմա էլ անհաջողություններն ու պարտություններն են բոլորինս։ Ի՞նչ հող է դրանով նախապատրաստում Նիկոլը»։

Արմեն Աշոտյանն ի պատասխանել  նշել է․ «Այդպիսի ձևակերպումը անհեթեթ է և ընդամենը մեկ նպատակ ունի՝ կրկին փորձ անել գցել վրայից իր պատճառով մեզ բաժին հասած և չավարտվող ողբերգությունը։ 

«Բոլորս ենք մեղավոր» բանաձևով Նիկոլը փորձում է փախչել պատասխանատվությունից։ Չէ, բոլորս մեղավոր չենք, որ նա տապալեց բանակցային գործընթացը, պատերազմ բերեց, հասցրեց կապիտուլյացիայի, կառչեց աթոռից, միլիարդներով փող մսխեց, քանդեց բանակը, դիվանագիտությանը վիժեցրեց, Ալիևի բերանը լեզու դրեց, հանդուրժեց Հայաստանի սուվերեն տարածքների զավթումը, հող նախապատրաստեց Արցախի հայաթափման համար, դավաճանեց Արցախին և այլն։ Ո՞ր մեկը ասեմ։ Եվ ինչո՞վ են բոլորը դրանում մեղավոր։ Հայ ժողովրդի այս պահի միակ հավաքական մեղքը մեկն է՝ այն, որ Նիկոլը դեռ վարչապետ է»։

Ըստ Աշոտյանի՝ իր մանիպուլյացիայի նա ուզում է իր վրայից գցել ոչ միայն արդեն գործած մեղքերը և հանցանքները, այլև գալիքները, «որ հերթական կորուստներից և զոհերից հետո, կրկին պլզացնելով իր աչքերը Պետրոսի վրա, հայտարարի՝ «ժողովուրդ ջան, ես ձեզ ասել եմ, որ համ վատ է լինելու, համ էլ ես մեղավոր չեմ»»։

«Ցավով նշեմ, որ 2024 թվական հայ ժողովուրդը մտնում է, որպես աշխարհի ամենաանթասիբ և անպատիվ ժողովուրդ։ Սա շատ դառը, շատ տհաճ, շատ մռմռացնող իրականություն է, որը չես քողարկի ոչ խոզի բդի հաստությամբ, ոչ բլինչիկի բարակությամբ, ոչ էլ սալաթների թարմությամբ։ Մնում է, որ 2024-ին իրական ջանքեր գործադրենք և ազատվենք այդ անպատվաբեր ու խայտառակ տիտղոսից»,- նշել է Աշոտյանը։

Քաղաքացի Կարինե Մարտիրոսյանը հարցրել էր․ «Նիկոլը ասուլիսի ժամանակ ասաց, որ (միտքը) իսկ ո՞վ է ասում, որ Արցախը ազատագրելը 1991-94 թվականներին ճիշտ էր, ՄԱԿ-ը և ամբողջ աշխարհն Արցախը Ադրբեջանի կազմում են ճանաչել, դրա համար այս խնդրի առաջ ենք կանգնել։ Ի՞նչ կասեք այս հարցի շուրջ»։

Ի պատասխան Արմեն Աշոտյանն ասել է․ «Նիկոլը պատկանում է այն մարդկանց տեսակին, որոնք ի սկզբանե արցախուրաց էին և արցախատյաց, որոնց համար կյանքի իմաստը «փորը կուշտ, տակը չոր» սկզբունքն է։ Արցախյան շարժումն իր սրտով չէր մինչև վարչապետ դառնալը ևս, բավարար է ընթերցեք իր հոդվածները։ Վարչապետի պաշտոնում իր հակաարցախյան կեցվածքը ևս մեկ շարժառիթ ունի․ նա փորձում է իր վրայից մաքրել դավաճանի, կապիտուլյանտի, ազգակործան պատուհասի խարանը՝ դիմելով ամենամեծ և անբարո ստերին։ Իրականում Արցախյան հարցով ամբողջ գործընթացը մեզ տանում էր հայկական Արցախի շարունակական գոյությանը, այդ թվում միջազգային գնահատականներով և մոտեցումներով։ Առավել մանրամասն կարող եք ծանոթանալ իմ՝ Արցախի հարցով Նիկոլի ստերը հաստատող հոդվածներում։ Դեռևս կայսր Նապոլեոնն էր ասում, որ մի ձախողակ բավական է պետությունը քանդելու համար։ Հայաստանը Ֆրանսիայի լեգենդար գործչի ասածի ապացույցը դարձավ»։

Օգտատեր Ռոլանդ Թամրազյանը հարցրել է՝ ՀՀԿ-ն ե՞րբ է կոնկրետ գործողությունների դիմելու։ Ըստ Աշոտյանի՝ ՀՀԿ-ն լիարժեք մասնակցել և աջակցել է Նիկոլին հեռացնելու նախորդ բոլոր հիմնական փորձերին։

«Մեր երկիրն այպիսի վիճակում է, որ ոչ մի առանձին ուժ իշխանափոխություն իրականացնել չի կարող, և Փաշինյանին գահընկեց անելը ոչ թե որևէ առանձին վերցրած կուսակցության, այլ համազգային համախմբման խնդիր է։ ՀՀԿ-ն չունի առաջինը լինելու ամբիցիա, բայց այդպիսի որոշման դեպքում, այդպիսի լայն քաղաքական և հանրային կոնսենսուսի դեպքում պատրաստ է իր ուսերին նոր ծանրություն վերցնել։ Այս օրինակը ուզում եմ կրկին բերել. անշուշտ, կարևոր է, թե ով է առաջին ջութակը, բայց ավելի կարևոր է, որ ամբողջ նվագախումբը ֆալշ չնվագի»,-նշել է Աշոտյանը։