Ձեր վստահելի աղբյուրը

Այսօր ժամը 19:00-ին «Նարեկացի» արվեստի միությունում տեղի կունենա  Արցախի պետական երգչախմբի՝ «Արվեստն ապրում է ամենուր» խորագրով համերգը: Ծրագրում կհնչեն արևմտաեվրոպացի և հայ կոմպոզիտորների խմբերգեր:

Համերգային ծրագրի նպատակն է Արցախի պետական երգչախումբը ներկայացնել հայաստանյան արվեստաշխարհին: Մուտքն ազատ է:

Արցախի Հանրապետության պետական երգչախումբը ստեղծվել է 1991թվականին, միջազգային տարբեր մրցույթների դափնեկիր է: Այսօրվա համերգը Արցախի պետական երգչախմբի համար առաջինն է բռնի տեղահանությունից հետո։

Արցախի պետական երգչախմբի գեղարվեստական ղեկավար և խմբավար  Նինա Գրիգորյանը Panorama.am-ի հետ զրույցում ասաց, որ հեշտ չէր կրկին հավաքել երգչախմբի բոլոր անդամներին։

«Մեր կոլեկտիվն ամուր ընտանիքի նման էր։ Միշտ բոլորը տրամադրված են եղել՝ որտեղ էլ լինենք, քանի հոգի էլ լինենք, անպայման պետք է հավաքվենք։ Դա չէր քննարկվում։ Սակայն Հայաստան գալուց հետո, երգչախմբի անդամները ցրվեցին տարբեր շրջաններով։ Գրեթե երկու ամիս չէի ուզում անհանգստացնել, գիտեի՝ բոլորը զբաղված էին իրենց անձնական խնդիրներով, տուն փնտրելով։

Նաև հոգեպես էր դժվար կրկին բեմ դուրս գալը։ Երգչախմբի անդամներն  ունեցել են սարսափելի կորուստներ, չէին կարողանում սկզբում գալ փորձերի, հետո դժվարությամբ էին գալիս, մինչև կարողացան քիչ թե շատ ընտելանալ։ Սակայն այդ վիճակից դուրս գալը բավականին երկար կտևի»,- ասաց Նինա Գրիգորյանը։

Հայաստանում փորձեր անցկացնելու համար երգչախմբին օգնել է  Հայաստանի երաժշտական ընկերության  նախագահ Դավիթ Ղազարյանը, Ռոմանոս Մելիքյանի անվան պետական երաժշտական քոլեջի տնօրեն Վարազդատ  Խաչումյանը։

«Մեր երգիչները չեն վարձատրվում։ Կարծես մեր կենսագրությունը 0-ից է սկսվում ինչպես 30 տարի առաջ, երբ մեծ ոգևորություն հավաքեցի և ութ տարի այդպես պահեցի մինչև ստացանք պետական կարգավիճակ։ Ճիշտ է, 0-ից ենք սկսում, բայց, բնականաբար, առաջվա ոգևորությունը չկա, քանի որ հիմա հոգսերը կրկնակի են, չենք կարող համեմատել 1990-ականների հետ. այն ժամանակ ունեցել ենք հայրենիք, իսկ հիմա ոչինչ չունենք՝ ոչ հայրենիք, ոչ տուն, ոչ աշխատանք, ոչ մի բան»,- ասաց Արցախի պետական երգչախմբի գեղարվեստական ղեկավարը։

Նա հույս ունի, որ  բարեգործներ կգտնվեն, որոնք կցանկանան իրենց օգնել՝ սկսած աշխատավարձից, մինչև տարածքի տրամադրում, որ կարողանան փորձեր անցկացնել, պարապել։

«Հայաստանի իշխանությունները չեն ուզում պետականացնել Արցախի համույթները։ Չեն ուզում, ընդհանրապես, Արցախ բառը հնչի։ Լավագույն դեպքում փորձում են Արցախի երգիչներին, պարողներին հայաստանյան տարբեր խմբերում ընդգրկել, սակայն դա էլ չի լինի, քանի որ հաստիքներ չկան, ընդհակառակ, կրճատվում են ստեղծագործական  խմբերը։

Բայց մենք ուզում ենք մեր ստեղծագործական ընտանիքները պահպանվեն, այդ պատճառով ձգտելու ենք բարեգործների գտնել»,- ասաց Ն. Գրիգորյանը։

Նա ասաց, որ առաջիկայում համերգներ կունենան Երևանում, կշրջեն Հայաստանի տարածքում։

«Բոլորին տեղյակ եմ պահել, որ այստեղ ենք, թեև կարգավիճակ չունենք, բայց դա բոլորովին նշանակություն չունի, պատրաստ ենք լուսավորչական ծրագրեր իրականացնել այստեղ, ինչպես անում էինք Արցախում»։

Նա նաև պատմեց, որ Արցախի Հանրապետությունում այս 30 տարիների ընթացքում բազմաթիվ համերգներ, դասախոսություններ է ունեցել։

«Շրջափակման սկզբում, երբ ձմեռ էր, լույս չկար, ջեռուցում չկար, փոքր խմբերով էինք աշխատում, իսկ հետո խնդիրներն էլ ավելի շատացան, գիշերները հացի հերթ էինք կանգնում, երգիչները հուսահատված էին, երգելու տրամադրություն չունեին։

Շրջափակում, պատերազմ, ռմբակածություն, բայց չէինք ուզում դուրս գալ մեր հայրենիքից։ Այնպես արեցին, որ ստիպված լքեցինք Արցախը,- ասաց Ն.Գրիգորյանը։

Նա Արցախի Հանրապետությունից բռնի տեղահանվել է սեպտեմբերի 30-ին ավտոբուսով։

«Երբ խոսում եմ անցյալից, հուզվում եմ։ Ծանր է՝ կամ պետք է գժվեմ կամ ընդհանրապես չխոսեմ»,- ասաց Արցախի պետական երգչախմբի գեղարվեստական ղեկավար և խմբավար  Նինա Գրիգորյանը։