Ձեր վստահելի աղբյուրը

«Դեկտեմբերի 22-ին Արցախի Հանրապետության նախագահ Սամվել Շահրամանյանը հանդիպել է Արցախի  կառավարության անդամների հետ, ասել է, որ Արցախի լուծարման փաստաթուղթ իրավական դաշտում գոյություն չունի»,- ասուլիսում ասաց  Արցախի Հանրապետության Ազգային ժողովի «Արդարություն» խմբակցության ղեկավար Դավիթ Գալստյանը։

Ըստ նրա, բարձրացած աղմուկը խոսում է  այն մասին, որ, այո, Արցախը կա, շարունակում է գործել հանուն արցախցիների, հայ ազգի։

«Այսօր Արցախի պետական ինստիտուտների գործունեությունը խոսում է այն մասին, որ Արցախի հարցը փակված չէ»,- ընդգծեց նա։

Խոսելով Արցախի ռազմաքաղաքական ղեկավարության՝ Ադրբեջանի կողմից գերեվարվելուն, ասուլիսին ներկա նույն խմբակցության անդամ Մետաքսե Հակոբյանն ասաց, որ արցախցին, հայտնվել ծանր վիճակում, ավելի խեղճացավ ու իրեն անպաշտպան է զգում նաև այն պատճառով, որ Արցախի ռազմաքաղաքական ղեկավարությունն իրենց կողքին չէ։

«Երբ նոր էինք բռի տեղահանվել, մտածում էինք՝ միգուցե աշխատանքներ են տարվում նրանց վերադարձի հետ կապված,  խոսքը  կարող է վնասել։ Կարճ ժամանակում հասկացանք ու համոզվեցինք, որ այդպես չէ, հակառակը՝ մեր լռությունը  վնասում է ոչ միայն մեր ռազամաքաղաքական իշխանություններին, նաև Ադրբեջանում գտնվող մեր հայրենակիցներին,  որոնց մասին Ադրբեջանն այևս չի էլ խոսում։ Այդ ուղղությամբ նաև հասարակության, քաղաքական ուժերի աշխատանքը պետք է լինի»։

Մ. Հակոբյանն ընդգծեց՝ կեղծ թեզեր են, որ կարող է Արցախը կամ Արցախի հետ կապված որևէ հարց վնասել Հայաստանին։

«Ոչ։ Արցախը գոնե գործնականում ցույց է տվել, որ 30 տարի շարունակ եղել է  Հայաստանի անվտանգության երաշխավորը, ինչպես Հայաստանն է եղել Արցախի անվտանգության երաշխավորը։ Մենք ականատես եղաք, երբ Հաայստանը,  ի դեմս իշխանությունների, հրաժարվեց Արցախից, մենք կորցրեցինք Արցախը։ Առավել քան համոզված եմ՝ երբևէ չի կարող լինել ուժեղ Հայաստան առանց Արցախ։ Հետևաբար, այստեղից է գալիս այն միտքը, որ մեզ կարողացել են  մոլորեցնել, մեզ կարողացել են հաղթել, որովհետև կարողացել են պառակտել։

Չի կարող Հայաստանն ապրել առանց Արցախ և հակառակը։ Սրանք պարզ ճշմարտություններ են,  որոնք մենք չընդունելու արդյունքում հայտնվեցինք այս իրավիճակում»,- ասաց նա։

Ըստ Դավիթ Գալստյանի, ռևանշիստական թեզը, որը մտել է  քաղաքական օրակարգ, հասկանալի է,  որ Ադրբեջանն ունի իր քաղաքական  ուղին և  ամեն կերպ փորձում է  առաջ տանել։

«Եթե խոսում ենք ռևանշիզմից ու  երբ ասում ենք՝ Արցախը հայկական է ու դա դիտարկվում է որպես ռևանշիստական մոտեցումներ, ապա վաղը նույն ձև Ադրբեջանը կարող է հարց դնել՝ եթե Հայաստանը ռևանշի չի պատրաստվում, ապա թող լուծարի պաշտպանության բանակը։

Այսինքն, մեր օրակարգային հարց դարձնել, թե Ադրբեջանն ինչ է ասում և մեր գործողությունները փորձել համաձայնեցել կամ տեղավորվել այն շրջանակներում, թե Ադրբեջանն ինչ է թույլ տալիս, ինչ թույլ չի տալիս, չպետք է լինի։ Մենք ունենք մեր օրակարգը՝ հզորացնելով Հայաստանը, վերադարձնել Արցախը»,- ասաց Դ. Գալստյանը։