Ձեր վստահելի աղբյուրը

«Ես չգիտեմ՝ իրենք դրանով ում են ուզում խաբել»,-News.am-ի հետ զրույցում նշել է ՀԱԿ փոխնախագահ Լևոն Զուրաբյանը՝ անդրադառնալով դիտարկմանը, որ Հայաստանի վարչապետ Նիկոլ Փաշինյանը Սանկտ-Պետերբուգում, ըստ էության, փորձել է տարանջատել քաղաքական և տնտեսական շահերը՝ նշելով, որ Հայաստանը, ՀԱՊԿ-ից դժգոհ լինելով, ԵԱՏՄ-ում տնտեսական կապերը շարունակում է:

«Փաշինյանը Սանկտ-Պետերբուրգում հայտարարեց, որ անընդունելի են աշխարհաքաղաքական օրակարգի խնդիրների արծարծումը զուտ տնտեսական ֆորումում: Ինքը ցույց է տալիս, որ ապրում է մի զուգահեռ աշխարհում, որտեղ նման բան հնարավոր է, բայց իրականությունն այն է, որ  ինչպես ասում էր փիլիսոփաներից մեկը, քաղաքականությունը տնտեսության խտացված արտահայտությունն է: Քաղաքական բոլոր հարցերը բխում են հիմնականում տնտեսական շահերից: Եթե Նիկոլ Փաշինյանի ուղեղում հնարավոր է քաղաքականությունն անջատել տնտեսությունից, նորմալ աշխարհում դա հնարավոր չէ:

Սա ուղղակի Փաշինյանը հնարել է որպես մի հնարք, որը թույլ է տալիս իրեն գոնե իր կեղծ արևմտամետ աջակից զանգվածի աչքերում երևալ ավելի հետևողական, թե իմ կուրսը սխալ չէր, ես քաղաքական բաղադրիչը մի կողմ եմ դրել, իսկ տնտեսականով գնում ենք համագործակցության»,-ասել է Լևոն Զուրաբյանը։