Ձեր վստահելի աղբյուրը

Սեպտեմբերի 25-ին Արցախի Հանրապետության Ստեփանակերտ-Ասկերան ճանապարհի հարակից տարածքում բենզինի պահեստում պայթյունի հետևանքով զոհվել է 218 անձ, 21 անձ համարվում է անհետ կորած, 3 դիակ նույանականացված չէ։ «Լուրերին» ասել է ՀՀ քննչական կոմիտեի նախագահ Արգիշտի Քյարամյանը։

Նա հայտնել է նաև, որ պայթյունի հետևանքով 120 անձ ստացել է տարբեր աստիճանի մարմնական վնասվածքներ։

Ինչ վերաբերում է պայթյունի պատճառներին, նա ասել է. «Մենք այս վարույթը հիմնականում նախաձեռնել ու քննում ենք այն համատեքստում, որ ընդհանուր իրավիճակը բխում է  էթնիկ զտման իրողություններից։ Եթե մարդիկ հարյուրներով, հազարաներով առանց մեկը մյուսին հերթ տալու գնացել ու օրհասական վառելիք են փորձել ձեռք բերել, վկայում է  այն մասին, որ մարդիկ անելանելի վիճակում են եղել։ Իսկ այդ իրավիճակը վկայում է  այն հոգեբանական երևույթների մասին, որոնցում հայտնվել են Ադրբեջանի քաղաքականության արդյունքում»։

Քյարամյանի խոսքով, նախաքննական մարմնին հայտնի է, որ  ՊԲ-ն այդ պահեստը սեպտեմբերի 19-20-ի գործողություններից հետո պաշտոնապես հանձնել էր ԼՂ իշխանություններին, որից հետո զոհերի թվում կան ոստիկանության երկու սպաներ, որոնք ծառայություն են իրականացրել այդ վայրում ։

«Պատճառը ես չեմ կարող նշել, թե ինչու է ՊԲ-ն պահեստը հանձնել իշխանություններին, ենթադրում եմ՝ ՊԲ կազմալուծման հետ կապված»,- ասել է նա։

Պահեստում պահվել է շուրջ 42 հազար տոննա վառելիք։ Պայթել է  միայն բենզինը։