Ձեր վստահելի աղբյուրը

Ֆրանսիացի հետազոտողները հաշվարկել են, որ կորոնավիրուսային համաճարակի առաջին ալիքի ժամանակ հիդրօքսիքլորոքին ընդունելու պատճառով մոտ 16,9 հազար մարդ կարող էր մահանալ։ «Գազետա ռու»-ն հայտնում է, որ այդ մասին գրված է Biomedicine & Pharmacotherapy ամսագրում։

Ուսումնասիրությունը վկայակոչել է Nature ամսագրում 2021 թվականին հրապարակված տվյալները: Նրանք հայտնել են մահվան դեպքերի 11% աճ սրտի ռիթմի խանգարումների և հիդրօքսիքլորոքինի օգտագործման այլ կողմնակի ազդեցությունների պատճառով: Դեղը նշանակվել է, չնայած «կլինիկական օգուտի ապացույց չկար»:

Նշվում է, որ դեղամիջոցից մահացությունների թիվը կարող է ավելի մեծ լինել, քանի որ հետազոտությունն ընդգրկում է միայն 2020 թվականի մարտից հուլիս ընկած ժամանակահատվածը։

Ներկայում մասնագետները հայտնում են, որ կորոնավիրուսը դարձել է սեզոնային հիվանդություն։ Այդ մասին հայտնել է Ռուսաստանի գիտությունների ակադեմիայի ակադեմիկոս Վասիլի Ակիմկինը։ COVID-19-ը մուտացիայի է ենթարկվել և սկսել է անցնել առանց ծանր ընթացքի։