Ձեր վստահելի աղբյուրը

Երևանի ընդհանուր իրավասության դատարանում, դատավոր Արթուր Մկրտչյանի գլխավորությամբ, ՊԵԿ նախկին նախագահ Գագիկ Խաչատրյանի գործով այսօրվա դատավարությունն ընդհատվեց՝ հաշվի առնելով նրա առողջական վիճակը։ Հաջորդ նիստը կկայանա հունվարի 19-ին։

Մինչ հետաձգումը, նիստի ընթացքում Գագիկ Խաչատրյանի ինքնազգացողությունը մի քանի անգամ վատացավ։ Պաշտպան Երեմ Սարգսյանն ասաց. «Մինչև դատարանը գալը՝ Գագիկ Խաչատրյանն ի վիճակի չէր մասնակցել։ Բայց նա ներկայացավ դատարան։  Երկար ժամանակ չի կարող մի դիրքով նստել, այս պահին ուժեղ ցավեր ունի։

Գտնում եմ, որ դատական նիստը պետք է հետաձգվի,  քանի որ ի վիճակի չէ մասնակցել նիստին»։

Հիշեցնենք, որ Գագիկ Խաչատրյանը  դատարան է բերվել բժշկական հաստատությունից, անվասայլակով է: Այս նիստում պաշտպանները ցանկանում էին ներկայացնել միջնորդություն՝ թույլ տալ Գ.Խաչատրյանին մեկնել Գերմանիա վիրահատության նպատակով։

2023 թ. դեկտեմբերի 12-ին դատարանը մերժել էր մեղադրող դատախազի միջնորդությունը խափանման միջոց գրավը փոխելու վերաբերյալ։ Ըստ դատախազի,  նախկին պաշտոնյան դրսևորում է ոչ պատշաճ վարքագիծ, բացակայում է նիստերից, բացի դրանից՝ ուղղորդում է դատավարության մյուս մասնակիցներին: Իսկ, ըստ դատավոր Արթուր Մկրտչյանի, Խաչատրյանը ունի մի շարք հիվանդություններ, որոնք հաստատվել են համապատասխան բժշկական փաստաթղթերով, բացի դրանից՝ նրա բացակայությունը անհարգելի չի համարվում, քանի որ դրա վերաբերյալ ներկայացվել են համապատասխան փաստաթղթեր:

Գագիկ Խաչատրյանին մեղադրանք է առաջադրվել  ՀՀ ՔՕ 308-րդ հոդվածի 2-րդ մասի 3-րդ կետով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ), 179-րդ հոդվածի 3-րդ մասի 1-ին կետով (յուրացնելը կամ վատնելը` առանձնապես խոշոր չափերով), 38-179-րդ հոդվածի 3-րդ մասի 1-ին կետով, 311-րդ հոդվածի 4-րդ մասի 2-րդ կետով (կաշառք ստանալը), 38-190-րդ հոդվածի 3-րդ մասի 1-ին կետով և 314-րդ հոդվածի 1ին-մասով (պաշտոնեական կեղծիք):