Ձեր վստահելի աղբյուրը

Սուր շնչառական վարակներով հոսպիտալացվածների թիվը վերջին շաբաթվա ընթացքում աճել է մոտ 15 տոկոսով, թոքաբորբով հիվանդներինը՝ 10 տոկոսով։ Panorama.am-ի հետ զրույցում նման վիճակագրություն ներկայացրեց ՀՎԿԱԿ համաճարաբան Եվգենյա Խաչատրյանը։

Ի հակառակ սրան, դիմելությունը և նախորդ շաբաթվա, և անցած տարվա նույն ժամանակահատվածի համեմատ նվազել է։

«Նախորդ շաբաթվա համեմատ դիմելության մի փոքր նվազում ունենք, նախորդ տարվա նույն ժամանակահատվածի համեմատ դիմելությունը նվազել է 1.2 անգամ։ Հոսպիտալացվածների 70 տոկոսը 0-18 տարեկան անձինք են։ Դիմելության մի փոքր ակտիվություն ենք նկատում 19-29 տարեկանների շրջանում։ Թոքաբորբով դիմելության առումով մի փոքր կայունացում է նկատվել»,-մանրամասնեց կենտրոնի մասնագետը։

Հունվարի 7-ի դրությամբ, սուր շնչառական վարակներով հոսպիտալացված է եղել 579 մարդ, որոնց 90 տոկոսը 0-18 տարեկան երեխաներն են։ Թոքաբորբով հոսպիտալացված է 181 պացիենտ, որի 60 տոկոսը 0-18 տարեկան երեխաներն են։

«Հունվարի 7-ի դրությամբ վերակենդանացման բաժանմունքներում հոսպիտալացված է 87 երեխա, սա օրական մշտադիտարկման արդյունքներն են»,-ասաց Եվգենյա Խաչատրյանը՝ ընդգծելով, որ Հայաստանում այժմ սուր շնչառական վարակների ակտիվ շրջանառության փուլում։

Հիմա Հայաստանում շրջանառվում է գրիպի ու վարակների մի քանի տեսակներ. Գրիպի A տեսակի H1N1, H3N2 ենթատեսակներ, գրիպ B տեսակի վիրուսի հարուցիչներ, ինչպես նաև այլ վարակների, այդ թվում նաև կորոնավիրուսի հարուցիչներ։

«Երբ ժամանակին չեն դիմում, հիվանդությունն ավելի է բարդանում։ Տեսեք, հոսպիտալացումների թիվը մեզ մոտ ավելացել է։ Դա պայմանավորված է հանգամանքով, որ ժամանակին չեն դիմել առողջության առաջնային պահպանման օղակ»,-ընդգծեց համաճարակաբանը՝ խորհուրդ տալով հիվանդության տարածումը կանխելու համար նախ պատվաստվել, ապա խուսափել վարակին բնորոշ երևույթներով հիվանդների հետ շփումից, օգտագործել շատ հեղուկներ, հագնվել եղանակին համապատասխան, օդափոխել փակ տարածքները, չօգտագործել հակաբիոտիկներ, քանի որ դրանք նախատեսված չեն վիրուսային հիվանդությունների բուժման համար։