Ձեր վստահելի աղբյուրը

«Գոյ» թատրոնի լուծարման վերաբերյալ կառավարության որոշման դեմ հայցն այժմ վճռաբեկ դատարանում է։ Թատրոնի ռեժիսոր Սարգիս Արզումանյանը Panorama.am-ի հետ զրույցում ասաց, որ թեև իրենք դիմել էին վարչական դատարան՝ պահանջելով անվավեր ճանաչել կառավարության որոշումը, որի համաձայն՝ թատրոնը պետք է լուծարվեր և միանար Գ. Սունդուկյանի անվան ազգային ակադեմիական թատրոնին, սակայն վարչական դատարանից գործը քաղաքացիական դատարան է տեղափոխվել։

«Մենք դիմել էինք վարչական դատարան, որը որոշել էր, որ վարչական դատարանի  գործը չէ, վերահասցեագրել էր քաղաքացիական դատարան։ Քաղաքացիական դատարանի դատավոր Գայանե Մազմանյանն էլ որոշեց, որ դա քաղաքացիական գործ չէ, վարչական դատարանի գործն է, դիմել է վճռաբեկ դատարանի նախագահին, որպեսզի գործը հետ ուղարկվի վարչական դատարան։

Հիմա սպասում ենք վճռաբեկ դատարանի որոշմանը, որ գործը հետ գնա վարչական դատարան ու այնտեղ քննվի։  Մեր ակնկալիքը միայն դատարանից է»,- ասաց նա։

Հիշեցնենք, որ ամիսներ  առաջ, երբ հայտնի դարձավ կառավարության մտադրության մասին ու որոշում ընդունվեց  «Արմեն Մազմանյանի անվան բեմարվեստի ազգային փորձարարական «Գոյ» կենտրոն» պետական ոչ առևտրային կազմակերպությունը միացման ձևով վերակազմակերպել` միացնելով «Գ. Սունդուկյանի անվան ազգային ակադեմիական թատրոն» պետական ոչ առևտրային կազմակերպությանը, դժգոհության ալիք բարձրացավ. թատրոնի դերասանները, տարբեր արվեստագետներ բողոքեցին այդ որոշումից՝ ահազանգելով, որ փորձում են փակել հերթական թատրոնը, մշակութային օջախը։ Բայց և այնպես, ԿԳՄՍ նախարար Ժաննա Անդրեասյանը դեկտեմբերի վերջին կայացած ասուլիսում ասել է՝ ««Գոյ» թատրոնի գործունեությունը որպես առանձին ՊՈԱԿ չենք պատկերացնում, այլ պատկերացնում ենք առանձին ստեղծագործական միավոր Գաբրիել Սունդուկյանի անվան ազգային ակադեմիական թատրոնի կազմում»։

Իսկ «Գոյ» թատրոնի դերասանները, Ս. Արզումանյանի խոսքով, հստակ որոշել են՝ ամեն դեպքում չեն գնալու աշխատել Սունդուկյանի անվան ակադեմիական թատրոնում։

«Մենք այնտեղ չենք աշխատելու։ Մենք այդ որոշմանը դեմ ենք, պետք չէ մեզ լավություն անեն։ Եթե ասում են լավություն ենք անում ձեր բարեկեցությունն ապահովելու համար, դա մեզ համար բարեկեցություն չէ, մենք չենք ընդունում այդ բարեկեցությունը։ Այնտեղ աշխատելու իմաստ չենք տեսնում։ Եթե դատարանը չչեղարակի այդ որոշումը, մենք կհավաքվենք, մի բան կանենք, կմտածենք մեր անելիքները, մտքեր կան, բայց չենք շտապում, հույս ունենք՝ արդարադատությունն այստեղ հաղթելու է»,- ասաց ռեժիսորը։

Դեկտեմբերի վերջին ԿԳՄՍ նախարարի հրամանով թատրոնի տնօրեն Սարգիս Չոլոյանն ազատվել է աշխատանքից, նախարարությունը նոր տնօրեն է նշանակել Կարեն Սիմոնյանին։ Նախարարի մեկնաբանմամբ, թատրոնի տնօրենը փոխարինվել է, որովհետև չի իրականացրել կառավարության որոշմամբ սահմանված պահանջները, այսինքն չի իրականացրել իր պարտականությունները. «Դա եղել է պատճառ, որ իրեն փոխարինենք և այնտեղ ունենանք մարդ, որը ավարտին կհասցնի գործընթացը»:

Սարգիս Արզումանյանն նախ ընդգծեց, որ տնօրենին գործից ազատելն ապօրինի է եղել,  նախապատրաստում են հայց ուղարկել դատարան. «Մեր տնօրենին առանց զգուշացնելու, նախագուշացնելու մեկ օրվա մեջ աշխատանքից ազատել են ապօրինի փաստաթուղթ չստորագրելու համար»։

Թատրոնի անձնակազմը նոր տնօրենին թատրոնում տեսել է  ընդամենը մեկ անգամ։

Հարցին՝ ինչո՞ւ են ուզում թատրոնը միավորել այլ թատրոնի,  ավելի վաղ նշվել էր, որ միավորման մասին սկսել են խոսել «Գարեգին Նժդեհ» ներկայացումից հետո, Ս. Արզումանյանն ասաց. «Ներկայացման պրեմիերայի հաջորդող օրը եղավ, չգիտեմ՝ դրանից առաջ ինչ էր եղել, ինչ չէ։ Կան ինչ-որ տրամաբանական կապեր, ենթադրում ենք՝ կարող է այդպես լինի։ Գուցե այլ բաներ լինեն։ Ինչքան ենթադրենք, որ այդպես է, իրենք իրենց փաստարկների մեջ այլ բաներ են նշում, որ անհիմն է.  նախագծում նշված է, որ իբր «Գոյ» թատրոնն իր պարտականությունների մեջ թերանում է,  դրա համար միավորում են, որ ընդհանուր ղեկավարումը մեկ տեղից լինի, այսինքն՝ դուք չեք կարողանում ղեկավարել թատրոնը, դրա համար միավորում ենք Սունդուկյանի անվան թատրոնի հետ,  ֆինանսական արդյունքները կբարելավվեն»։ Նա հիշեցրեց, որ Կամերային երաժշտական թատրոնը նույնպես միավորել են մեկ այլ թատրոնի, սակայն այն թատրոնը չէր թերանում։ 

«Այսինքն ծրագիր է՝ կամաց-կամաց մշակութային օջախները միավորում են։ Վերջերս էլ պարային խմբեր միավորեցին։ Մշակութային ջարդ է, դա ծրագիր է»,- ասաց «Գոյ» թատրոնի ռեժիսոր Սարգիս Արզումանյանը։

Ավելի մանրամասն՝ ձայնագրությամբ։