Ձեր վստահելի աղբյուրը

«Եթե կարիք լինի որևէ համարժեք հայտարարությամբ պատասխանելու, ՊՆ-ն իր կայքեջում կտարածի»,-  ԱԺ-ում լրագրողների հետ զրույցում ասաց պաշտպանության փոխնախարար Արման Սարգսյանը՝ պատասխանելով հարցին, թե ինչպե՞ս է գնահատում նախօրեին Ադրբեջանի նախագահ Իլհամ Ալիևի հայտարարությունները:

Անդրադառնալով բանակում վերջին օրերին արձանագրված 2 սպայի մահվան դեպքերին, նա ասաց. «Լավ կլինի սպասենք, որ քրեական վարույթի շրջանակներում նախաքննական մարմինները տեղեկատվություն տրամադրեն։

Ցավոք, նման դեպքեր եղել են և այսօր էլ կան։ Պետք է սպասենք և հետո կխոսենք քննության արդյունքների մասին»։

Ինչ վերաբերում է այդ դեպքերի հետ կապված հրաժարականներին, նա ասաց. «Պետք է տեղի ունենա քննություն և քննության արդյունքներով ենթադրյալ մեղավորներ պատժվեն»։

Հիշեցնենք, որ բանակում մեկ օրում մահվան երկու դեպք է գրանցվել։ Հունվարի 9-ի ՊՆ-ն հայտնեց, որ զորամասի մարտական դիրքում հայտնաբերվել է Կարեն Կարապետյանի դին՝ հրազենային վնասվածքով, նույն օրն ավելի ուշ տեղեկացրեց երկրորդ զինծառայողի՝ ավագ լեյտենանտ Միքայել Դանիելյանի մահվան մասին։

ՔԿ-ի հաղորդմամբ՝ սպա Միքայել Դանիելյանը, ըստ նախնական տվյալների, մահացու վնասվածքը ստացել է իրեն ամրակցված ինքնաձիգից կզակի շրջանում արձակած կրակոցի հետևանքով։
Մյուս դեպքով ՔԿ-ն հայտնել էր, որ մարտական դիրքում ինքնաձիգից արձակված կրակահերթից մահացու հրազենային վիրավորում է ստացել պայմանագրային զինծառայող, մարտական դիրքի պատասխանատու Կ․Կ․-ն։