Ձեր վստահելի աղբյուրը

Առողջապահության նախարար Անահիտ Ավանեսյանն այսօր ամփոփեց իր ղեկավարած գերատեսչության 2023 թվականի կատարած աշխատանքների արդյունքները։ Panorama.am-ը հարց ուղղեց նախարարին. «Տիկին նախարար, մեզ հայտնի է դարձել, որ միմյանց հետ որևէ կապ չունեցող երկու կենտրոնների՝ Այրվածքաբանության և Մաշկաբանության ազգային կենտրոնների միավորումը նախաձեռնել եք զուտ մեկ նպատակով՝ մաշկաբանության ազգային կենտրոնի շենքն ու տարածքը վաճառքի հանելու համար։ Արդյո՞ք սա ճիշտ է»։

Անահիտ Ավանեսյանը պատասխանեց. «Այրվածքաբանության և մաշկաբանության կենտրոնները գտնվում են նույն տարածքում, ֆունկցիոնալ առումով իրար հետ բավականին համահունչ են և մեր նպատակներ է առողջապահական կազմակերպությունների կառավարման ծախսատարության նվազեցումը և վարչական ծախսերի օպտիմալացումը։

Արված փոփոխությունների ազդեցությունը, նաև կենտրոնի զարգացման մասով, արդեն այս տարի ակնհատյտ է։ Մեզ համար շատ կարևոր է այդ ճյուղերի զարգացումը և այս տարի երկու շենքերում էլ կսկսվեն վերանորոգման բավական լայնածավալ աշխատանքներ։

Մենք այս կենտրոնների հետ կապված կրճատման, չգիտեմ, շենքերի վաճառքի հետ կապված խնդիրներ չունենք, բայց այն էլ կարծում եմ նորմալ գործընթաց է և պետությունն իր ենթակառուցվածքները պետէ է օգտագործի շատ օպտիմալ կերպով։

Ոչ այս կենտրոնների մասով, այլ որպես ընդհանուր սկզբունք, եթե որոշվում է, որ դրանք պետք է միանան, առանձնան, փոփոխվեն, ապա այն նորմալ գործընթաց է և ոչ մի խնդիր այդտեղ չեմ տեսնում։ Կարևորը նպատակը ծառայությունները զարգացնել են և այդ ուղղությամբ մենք անում ենք ներդրումներ։ Ինչպես նշեցի, երկու կենտորններում էլ այս տարի կսկսենք վերանորոգման աշխատանքները։

Մենք տեսանք , թե ինչ ահռելի աշխատանքներ կատարեց այրվածքաբանության ազգային կենտրոնը և ես, առիթն օգտագործելով, ուզում եմ շնորհակալություն հայտնել բուժաշխատողներին այդ ծառայությունների համար»։