Ձեր վստահելի աղբյուրը

«Վերջին օրերին Բաքվից հնչող հայտարարությունները համարում եմ լրջագույն հարված խաղաղության գործընթացին»,- Գավառում «Քաղաքացիական պայմանագիր» կուսակցության նախաձեռնող խմբի նիստին ասել է Նիկոլ Փաշինյանը։

Նա նշել է պատճառները. «Մի քանի անգամ հրապարակային արձանագրված պայմանավորվել ենք, որ ՀՀ և Ադրբեջանի միջև խաղաղությունը սահմանների դիլիմատացիան և դեմարկացաիան հիմնաված լինի 1991 թվականի դեկտեբերի Ալմաթիի հռչակագրի վրա։ Սա  նշանակում է, որ Հայաստանը և Ադրբեջանը միմյանց տարածքային ամբողջականությունը ճանաչում են այն ըմբռմամբ, որ Հայաստանի տարածքը ճշգրիտ այնքան է, ինչքան եղել է  հայկական սովետական սոցիալիստական  հանրապետության տարածքը, նույնն Ադրբեջանի դեպքում։ 

Այն, ինչ ասում են Ադրբեջանից ամենաբարձր մակարդակով, ուղիղ հակասում է այս տրամաբանությանն ու այս պայմանավորվածությանը։

Չնայած Ադրբեջանում նախընտրական շրջան է, բայց սա շատ կարևոր նորություն է, պետք է պարզաբանվի։

Առաջին տպավորությունն այն է, որ Ադրբեջանը, ի հեճուկս պայմանավորվածությունների, փորձում է  տարածքային պահանջներ գեներացնել Հայաստանի նկատմամբ, ինչը բացարձակապես անընդունելի է»։ 

Փաշինյանի խոսքով, Ադրբեջանն արդեն երեք տարի «Զանգեզուրի միջանցքի» վերաբերյալ խոսույթ է զարգացնում՝ հղում անելով նոյեմբերի 9-ի եռակողմ հայտարարությանը:

«Ով «Զանգեզուրի միջանցք» արտահայտություն կգտնի այդ հայտարարության մեջ, խոստանում եմ դրամական պարգև։ Ցավոք, այդ պարգևը ոչ մեկ չի կարող ստանալ, քանի որ այդպիսի արտահայտություն եռակողմ հայտարարության մեջ չկա»,- նշել է նա։

Փաշինյան նաև ասել է. «Ըստ էության, եռակողմ հայտարարության կողմերից երկուսը, ստորագրման պահից մինչև 2023 թվականի սեպտեմբեր ընկած ժամանակահատվածը ցույց են տվել, որ այդ փաստաթուղթն իրենց համար այլևս գոյություն չունի, այսինքն այն գործողությունները, որոնք ձեռնարկվել են Լեռնային Ղարաբաղում, ընդ որում՝ ՌԴ և Ադրբեջանի մասնակցությամբ, վկայությունն է այն բանի, որ իրենց համար այդ փաստաթուղթն այլևս գոյություն չունի։ Չի կարող այնպես լինել, որ եռակողմ հայտարարության երկու կողմի համար այդ փաստաթուղթն այլևս չկա, իսկ երրորդ կողմի համար այդ փաստաթուղթը շարունակի գոյություն ունենալ»։

Փաշինյանն ասել է, որ պատրաստ է Հայաստանի տարածքով Ադրբեջանին միջանցք տրամադրել այն նույն տրամաբանությամբ, ինչ Իրանն իր տարածքով տալիս է միջանցք Ադրբեջանին` Նախիջևան հասնելու համար։

Ելույթն ամբողջությամբ՝ տեսանյութում։