Ձեր վստահելի աղբյուրը

«Արթուր Սահակյանի մասշտաբի ռեժիսորի համար պետությունը պետք է հարթակ ու ամեն պայման ստեղծի, որ այդ մարդն արարի, իսկ մենք խանգարում ենք»,- ԿԳՄՍ նախարարության դիմաց «Գոյ» բեմարվեստի ազգային փորձարարական կենտրոնի լուծարման դեմ բողոքի ակցիայի ժամանակ ասաց մշակութաբան, «Կարին» ավանդական երգի-պարի խմբի հիմնադիր և գեղարվեստական ղեկավար Գագիկ Գինոսյանը։

Նշենք, որ ռեժիսոր, բեմադրիչ Արթուր Սահակյանը «Գոյ» բեմարվեստի ազգային փորձարարական կենտրոնի գեղարվեստական ղեկավարն է։ ԿԳՄՍ նախարարի որոշմամբ, «Գոյ» թատրոնը պետք է լուծարել ու միացնել Գ. Սունդուկյանի անվան ազգային ակադեմիական թատրոնին։ Սակայն «Գոյ» թատրոնի անձնակազմը  դեմ է այդ որոշմանը։

Գ.Գինոսյանի չգիտի, թե որն է թատրոնի լուծարման պատճառը. «Կարող է իրենց ազատախոսությունը, իրենց բեմադրությունները Նժդեհի, Չարենցի մասին։ Ես չգիտեմ էլ որտեղ են ազգային ներկայացումներ արվում, իսկ «Խաղաղության խաչմերուկը» պահանջումը է  Նժդեհից չխոսել, Զանգեզուրից չխոսել։ Կարծում եմ՝ դա լուրջ խնդիրներ է առաջացնում մարդկանց համար։

Երևի թե խնդիրն ավելի գաղափարախոսական է, քան մշակութային։ Կարծում եմ՝ մեր նման երկրում, մեր նման խնդիրներ ունեցող և  ծնկի եկած երկրում մշակույթը գաղափարախոսական պետք է լինի, կրի ազգային գաղափարախոսություն,  առավել ևս երբ որ պետությունը այդ բացն ունի։ Վերածնունդը հեռու չէ, վերածնունդը լինելու է գաղափարական։ Այս տեսանկյունից «Գոյ» թատրոնի տեղն ավելի քան ակնառու է։

«Գոյ»-ը հզոր ասելիք ունի՝ սերունդ դաստիարակել, պարտավողական հոգեբանությունը մեր միջից ջնջել։ Ազգային ինքնաճանաչությունը վերածնելու համար «Գոյ» թատրոնն ավելի քան պիտի կայանա։ Պետք է նպաստենք, որ «Գոյ» թատրոնի առաքելությունն այդ փոքր դահլիճից դուրս գա, ավելի մեծ դահլիճների լինեն, վերածվի հեռուստաթատրոնի, որպեսզի ողջ ազգը լսի, հասկանա, ընկալի»։

Մանրամասն՝ տեսանյութում։