Ձեր վստահելի աղբյուրը

«Ինչքան խոսում ենք բանակում բարեփոխումների, Զինված ուժերում նորարարությունների մասին, այնքան ունենում ենք առավել վատ պատկեր և առավել մտահոգիչ երևույթների արձանագրում»,- Մեդիա կենտրոնում «Ուրիշի երեխան. բանակում զինվորների մահվան վիճակագրությունը տագնապեցնող է» թեմայով քննարկման ժամանակ ասաց ԱԺ «Պատիվ ունեմ» խմբակցության պատգամավոր Թագուհի Թովմասյանը:

Նա նշեց, որ անընդհատ խոսվում էր նախկին  կոռումպացված գեներալիտետից ազատվելու մասին և ազատվեցին:

«Հիմա բոլոր «հին» մարդիկ բանակից դուրս են եկել ու նոր մարդիկ են կառավարում: Այսօր ասել, որ նախկին բարքերն են, այդ  ձևակերպումը չեմ ընդունում։ Խնդիրը համակարգային է։ Մեծ դերակատարում ունի այն կարևոր իրողոթյունը, թե բանակով և Զինված ուժերով այժմ զբաղվում են մարդիկ, որոնք իրենք բանակում չեն ծառայել, տարրական կանոնադրային հարաբերությունները չեն պատկերացնում, բնականաբար,  նրանք չեն կարող պատկերացնել, թե շարքերում ինչ է իրականում տեղի ունենում։

Մի արձանագրում ևս. սա եզակի դեպք է, որ Նիկոլ Փաշինյանի հետ երևի պիտի համաձայնեմ՝ այո, մեր երկրում հարցեր չեն լուծվում: Եվ այդ հարցեր չլուծելը ծնում է նոր անպատասխանատվություն: Եթե ժամանակին բարձրացված խնդիրներն ունենան ռեալ և օբյեկտիվ լուծում, մենք բանակում չենք ունենա մահվան ելքով կորուստներ»,- ասաց Է. Թովմասյանը։

Նա նշեց, որ պետական համակարգի նկատմամբ այսօր չկա վստահություն, որովհետև շատ պրոֆեսիոնալներ հրաժարվում են պետության հետ առնչվելուց և գնում են մասնավոր դաշտ:

«Այդ խնդրին մենք բախվում ենք խորհրդարանում գրեթե ամեն օր.  տեսնում ենք  օրումեջ մի նախարար կամ փոխնախարար է գալիս զեկուցելու, որոնք ուղղակի անտեղյակ են իրենց աշխատանքից, ոլորտից: Սա չի կարող իր ազդեցությունը չունենալ բանակի վրա: Հիշենք նաև վերջին շրջանում պաշտպանության քանի փոխնախարար է փոխվել, որոնք տարբեր ոլորտներ պետք է համակարգեն, ինչ առնչություն ունեն բանակի, զինվորականության հետ»,- ասաց Թ. Թովմասյանը։

Քննարկմանը ներկա ՀՀ Մարդու իրավունքների պաշտպանի աշխատակազմի Քրեական արդարադատության ոլորտում և զինված ուժերում մարդու իրավունքների պաշտպանության դեպարտամենտի Զինծառայողների և նրանց ընտանիքների անդամների իրավունքների պաշտպանության բաժնի պետ Անդրանիկ Եղոյանն ասաց, երբ խոսում են խաղաղ պայմաններում զինծառայողների մահվան մասին, միանգամից մտածում են կարգապահության հետ կապված հարցերի մասին:

«Սա ամենախորքային խնդիրն է, որ տարիներ շարունակ եղել է, կա և ներկայումս ևս ամենացավոտ, ամենախոցելի խնդիրն է  Զինված ուժերի համար»,- ասաց նա։

Ա. Եղոյանը նշեց, որ իրենց  աշխատակազմում մշտապես վիճակագրություն է վարվում, վիճակագրության հիմքում են նաև պետական իրավասու մարմինների տրամադրած տեղեկությունները: Ներկայացված վիճակագրության համաձայն, խաղաղ պայմաններում 2018թ. մահվան 63 դեպք է արձանագրվել, 2019-ին՝ 49, 2020թ.՝ 54 դեպք, 2021-ին՝ 58 դեպք, 2022-ին՝ 64, 2023թ. շատ ավելի շատ:

«Վերջին 4 տարիների վիճակագրությունը ցույց է տալիս, որ Զինված ուժերում ունենք մահացության դեպքերի դինամիկ աճ:

Դինամիկ աճ ունենք  նաև ինքնավնասումների մասով՝  2020թ՝ 65, 2021թ՝ 77, 2022-ին՝ 108 ինքնավնասման դեպք։

Այս ամեն ինչը խոսում է նախ և առաջ Զինված ուժերում կարգապահության հետ կապված լրջագույն խնդիրների մասին։

Եվրոպական դատարանն ասում է, որ զինծառայողները գտնվում են պետության ձեռքերում, զինված ուժերում ինչ տեղի է ունենում՝ մահացություն, ինքնվնասում, վնասում, բոլորն ուղիղ պետության պարտականության պատասխանատվության տիրույթում են»,- ասաց ՄԻՊ ներկայացուցիչը։