Ձեր վստահելի աղբյուրը

«Զինված ուժերում խաղաղ պայմաններում զինծառայողների մահվան դեպքերի պատճառը պատասխանատվության իսպառ բացակայությունն է», - Մեդիա կենտրոնում «Ուրիշի երեխան. բանակում զինվորների մահվան վիճակագրությունը տագնապեցնող է» թեմայով քննարկման ժամանակ «Լրագրողներ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանը։

Համեմատելով այսօրվա վիճակը տարիներ առաջվա հետ, ըստ նրա, վիճակագրությունը ցույց է տալիս, որ  շատացել են բանակում մահվան դեպքերը։

«Ճիշտ է, եղել են դեպքեր, որ նույն զորամասում կարող է երկու դեպք լինել, բայց մահվան դեպքերի նման հաճախականություն երբեք չի եղել»,- ասաց իրավապաշտպանը։

Խոսելով  2023 թ. հունվարի 19-ին Ազատ գյուղում 15  զինվորների այրվելու դեպքի մասին՝ նշեց. «Դրանից հետո մտածում էիր, որ ինչ-որ բան պետք է տեղից շարժվեր։ Բայց, փաստորեն, ոչինչ  չի շարժվում։

Մենք չենք լսում հանրության առջև բացատրություն, դա արդեն անպատասխանատվություն է, մենք չենք լսում այդ ընտանիքների առջև բացատրություն, թե ինչու են իրենց որդիները սպանվում, երբ իրենց պատասխանատվության ներքո են գտնվում: Երբևիցե չենք լսում Պապիկյանի ելույթներն այդ կապակցությամբ կամ ինչ են անելու, որ իրավիճակը շտկեն»։

Նա հիշեցրեց, որ պաշտպանութան նախարար եղած ժամանակ Սեյրան Օհանյանը խոսում էր նման դեպքերի մասին. «Ճիշտ է, այնպես չէ, որ ինչ որ բան էր փոխվում, ամեն դեպքում  այն ժամանակ նման թվեր չկային, նա գնում էր զորամաս, դեպքի վայր։ Իսկ հիմա...  Երբեմն կասկածում եմ, որ պաշտպանության նախարարը Սուրեն Պապիկյանն է, որովհետև ինքը չկա, գոյություն չունի, որպեսզի արտառոց  դեպքերի ժամանակ գա, գլուխ  խոնարհի, ցավակցի։ Ոչինչ չեն անում։

Ուղղակի հռչակում են, որ իրենք հանձնարարական տվողներ են։ Մարդկային կյանքերն իրենց վրա չեն ազդում, եթե ազդեին, տարին չէր սկսվի մահվան երեք դեպքով ու մնացած դեպքերով»:

Նա նշեց, որ Զինված ուժերում մահվան դեպքերի մասին պաշտոնական թվեր չեն հրապարակում, բայց  Հելսինկյան քաղաքացիական ասամբլեայի Վանաձորի գրասենյակի տվյալներով՝ անցյալ տարի բանակում ոչ մարտական պայմաններում 83 մահվան դեպք է գրանցվել։

«Ոչ մի պատասխանատվության զգացում չունեն՝ վարչապետից սկսած մինչև նախարար։
Այդ մահերը ... Զինվորներին պետք է իրենց զավակների հետ համեմատեին, մտածեին իրենց զավակը կարող էր  լինել, այսինքն այդպես պետք է վերաբերվեն զինվորներին։ Զինվորների նկատմամբ վերաբերմունքը շատ վատ է։ Դա տեսնում ենք ամեն օր»,- ասաց Ժաննա Անդրեասյանը։