Ձեր վստահելի աղբյուրը

«Կարծում եմ՝ չպետք է ամաչենք եռակողմ հայտարարությունների կարևորությունը գնահատելիս, որոնք Ռուսաստանի Դաշնության, Հայաստանի և Ադրբեջանի ղեկավարները ստորագրվել են 2020-2022 թվականներին։ Շատ տխուր է, որ Հայաստանին ձեռնտու նման գործնական բանը, ինչպիսին է Սյունիքի մարզով երթուղու բացումը, դեռ մնում է թղթի վրա»,-հունվարի 18-ին լրագրողների հետ հանդիպման ժամանակ ասաց ՌԴ ԱԳ նախարար Սերգեյ Լավրովը։

«Եվ, ամենայն հարգանքով, բայց ես պատճառը տեսնում եմ Երևանի դիրքորոշման մեջ։ Չգիտեմ՝ ով ինչ է խորհուրդ տալիս Երևանին։ Մենք տեսանք, թե ինչպես Եվրամիությունը, Ֆրանսիան, Գերմանիան, ԱՄՆ-ը, հենց որ հասկացան, որ ռուս-հայ-ադրբեջանական գործընթացն արդյունք է տալիս ճանապարհների ապաշրջափակման, սահմանների սահմանազատման և խաղաղության պայմանագրի պատրաստման հարցում, նրանք անմիջապես սկսեցին առանց հրավերի ներգրավվել այդ գործընթացների մեջ և խաղացին փչացնողի դեր»,-հայտարարեց Լավրովը։

Այս համատեքստում ՌԴ ԱԳՆ ղեկավարը նշեց, որ 2003 թվականին Ռուսաստանը միջնորդական դեր է կատարել և Քիշնևի ու Տիրասպոլի հետ համաձայնեցրել է հուշագրի տեքստը, որը նույնիսկ նախաստորագրվել է։ Ըստ լավրովի, համաձայնագիրը չստորագրվեց Մոլդովայի վրա Եվրամիության ճնշման պատճառով։ «Նաև յոթ տարի առաջ ուկրաինական խնդիրը կարող էր լուծվել, եթե իրագործվեին Մինսկի պայմանավորվածությունները։ Բայց Արևմուտքը այն թույլ չտվեց»,-ասաց Լավրովը։

«Ես բոլոր հիմքերն ունեմ ասելու, որ Արևմուտքը չի ցանկանում թույլ տալ, որ կյանքի կոչվեն Ռուսաստանի միջնորդությամբ Երևանի և Բաքվի միջև կնքված համաձայնագրերը»,-նշեց Լավրովը և հավելեց. «Օրինակներից մեկը Սյունիքի մարզով անցնող ճանապարհն է։ Հենց Հայաստանն այսօր դժվարություններ ունի եռակողմ հայտարարության մեջ նծված ձևով երթուղու բացման հետ կապված։ Հայաստանն է, որ նոր պահանջներ է առաջադրում՝ կապված երթուղու անվտանգության ապահովման հետ։ Նրանք չեն ցանկանում, որ ռուս սահմանապահները տեղակայվեն այնտեղ, չնայած սա ուղղակիորեն գրված ու ստորագրված է վարչապետ Փաշինյանի կողմից։ Նա չի ցանկանում, որ չեզոք մաքսային և սահմանային հսկողություն լինի։ Միայն իրենք իրենցով։ Եվ այն հակասում է համաձայնեցվածին»։

ՌԴ ԱԳՆ ղեկավարը նաև նշել է, որ Մոսկվան հրավիրված չէ հայ-ադրբեջանական սահմանի սահմանազատման հանձնաժողովների աշխատանքներին։

«Մենք առաջարկել ենք մեր ծառայությունները, ավելին, կողմերը պայմանագիր են կնքել, որ ստեղծելու են սահմանազատման հանձնաժողով, որին ռուսական կողմը կմասնակցի որպես խորհրդատու։ Մեզ այնտեղ չեն հրավիրում»,-ասաց Լավրովը։

«Շառլ Միշելն արդեն հայտարարել է, որ Եվրամիությունը կզբաղվի սահմանազատմամբ, թեև, եթե ես ճիշտ եմ ուսումնասիրել աշխարհագրությունը, ոչ Հայաստանը, ոչ Ադրբեջանը երբևէ չեն եղել որևէ ասոցիացիայի մաս ԵՄ ներկայիս տարածքում, և Եվրամիությունը չի կարող որևէ քարտեզ ունենալ։ Ռուսաստանի Դաշնությունն ունի քարտեզներ, և այն ձեռք է տալիս կողմերին, սակայն ձեռք չի տալիս ԵՄ-ին և ԱՄՆ-ին, որոնք նույնպես ցանկանում են սահմանազատել օվկիանոսի այն կողմից»,-նշեց ՌԴ ԱԳ նախարարարը՝ հավելելով. «Նրանց մոտ ինչ-որ կերպ հայտնվել են ԽՍՀՄ Գլխավոր շտաբի քարտեզները։ Եվ դրա համար էլ ասում են՝ «ձեզ ռուսներ պետք չեն, մենք ունենք այս քարտեզը»։ Տարօրինակ կարող  է թվալ Մեծ մարդիկ են, բայց պարզապես խաղում են «ով է ավելի կարևորը» և ով կարող է իրենց համար լրացուցիչ միավորներ հավաքել միջազգային ասպարեզում»։

Լավրովը նաև Ռուսաստանի և Արևմուտքի նկատմամբ Հայաստանի վերաբերմունքն անվանել է ՀՀ ղեկավարության ընտրություն։

«Հայաստանն արդեն հրապարակայնորեն հայտարարել է, որ Հավաքական անվտանգության պայմանագրի կազմակերպությունը հիասթափեցրել է իրենց, Ռուսաստանն էլ է հիասթափեցրել, բայց Արևմուտքը չհիասթափեցրեց։ Սա Հայաստանի ղեկավարության ընտրությունն է»,-ասաց նա։

Լավրովը նշել է, որ հասարակությունն այս հարցում տարբեր տեսակետներ ունի։
«Մենք այս հարցի վերաբերյալ կարծիքներ ունենք հասարակությունից, դրանք ազատորեն արտահայտվում են, որոշ հայտարարությունների համար ՀՀ կառավարությունը նույնիսկ պերսոնա նոն գրատա է հայտարարել Ռուսաստանի մի շարք քաղաքացիների, ինչը, իհարկե, դաշնակիցների հարաբերություններում իրադարձությունների բավականին անսովոր զարգացում է»,-ասել է նա։