Ձեր վստահելի աղբյուրը

«Մենք այս պահին գտնվում ենք սուր շնչառական վարակների ակտիվ շրջանառության փուլում, ունենք սուր շնչառական վարակների ակտիվութան աճ»,-Panorama.am-ի հետ զրույցում հայտնեց ՀՎԿԱԿ համաճարակաբան Եվգենյա Խաչատրյանը։

Կենտրոնի ունեցած տվյալներով, միայն հունվարի 17-ին հանրապետության ամբուլատոր պոլիկլինիկական կազմակերպություններ են դիմել սուր շնչառական վարակներ ախտորոշմամբ 1825 պացիենտ, որոնց 66-67 տոկոսը կազմում են 0-18 տարեկան երեխաները։

«Եթե ներկայացնենք շաբաթվա կտրվածքով, ապա վերջին շաբաթվա ընթացքում հիվանդությունների աճ է գրանցվել մոտ երկու անգամ, իսկ նախորդ տարվա նույն ժամանակահատվածի համեմատ գտնվում ենք միևնույն մակարդակի վրա։ Շաբաթվա ընթացքում արձանագրված վարակի դեպքերի 65 տոկոսը կազմում են 0-18 տարեկանները»,-ասաց նա։

Հունվարի 17-ի դրությամբ հանրապետության հիվանդանոցներում սուր շնչառական վարակներով հոսպիտալացված է 735 պացիենտ, որոնց 87 տոկոսը կազմում են 0-18 տարեկան երեխաները։ Նույն օրվա դրությամբ 328 պացիենտ հոսպիտալացված է թոքաբորբով, որոնց 60 տակոսը երեխաներ են։

«Հանրապետւթյունում շարունակում են շրջանառվել գրիպի A տեսակի H1N1, H3N2 ենթատեսակներ, գերակշռում է H3N2 ենթատեսակը, գրիպ B տեսակի վիրուսի հարուցիչներ, ինչպես նաև այլ շնչառական  վարակներ՝ այդ թվում ռեսպիրատոր վիրուսը, որը ևս գերակշռում է, ռինովիրուսի, ադենովիրուսի,  բոկավիրուսի, կորոնավիրուսի և այլ հարուցիչներ»,-մանրամասնեց մասնագետը։

Վարակիչ հիվանդություններից մեկը՝ կորոնավիրուսը ևս նահանջի միտումներ ցույց չի տալիս։

«Հունվարի 15-ի դրությամբ, վերջին 14 օրվա ընթացքում արձանագրվել է հիվանդացության 130 դեպք, ինչը նախորդ 14 օրերի ընթացքում նվազել է երեք դեպքով, կարելի է ասել, մի փոքր կայունացում ունենք կորոնավիրուսային հիվանդության առումով»,-ասաց կենտրոնի մասնագետը։

Համաճարակաբանը  հիշեցնում է՝ հիվանդության կանխման համար կարևոր է  հաճախ օդափոխել սենյակները, իրականացնել խոնավ մաքրում, ախտանիշներն ի հայտ գալուն պես դիմել բժշկի։

«Մրսածության գործոնը նպաստում է, որ անձի մոտ ավելի արագ զարգանա սուր շնչառական վարակը։ ՍՇՎ ախտանշանները բազմազան են, հիվանդը կդժվարանա, ըստ գանգատների հասկանալ, թե որ վարակն է իր մոտ։ Դրա համար պետք է հնարավորինս շուտ դիմել բժշկի, որպեսզի զննում, ախտորոշում իրականացվի, նշանակվի բուժում։ Վարակների ժամանակ լինում է  հիմնականում քթահոսություն, հազ, կոկորդի քերոց, ջերմության բարձրացում, հոդացավ, մկանային ցավ, ընդհանուր թուլություն՝ մինչև որպես բարդություններ ականջաբորբ,  թոքաբորբ, բրոնխիտ և այլն, որը շատ հաճախ զարգանում է 0-4 տարեկան երեխաների շրջանում։ Եթե ծնողը տեսնում է, որ երկու օրվա ընթացքում երեխայի մոտ լավացում չի գնում, պետք է դիմել բժշկի»,-ընդգծեց Է. Խաչատրյանը։