Ձեր վստահելի աղբյուրը

Անցած շաբաթվա վերջին ադրբեջանական լրատվամիջոցները և թելեգրամ ալիքները տարածեցին Արցախի նախկին նախագահներ Արկադի Ղուկասյանի, Բակո Սահակյանի, Արայիկ Հարությունյանի, Հանրապետության պաշտպանության նախկին նախարար Լևոն Մնացականյանի գերության մեջ գտնվելու մասին լուսանկարները։

Լուսանկարների հրապարակումը մեկնաբանել է ռուս-իսրայելցի բլոգեր Ալեքսանդր Լապշինը։ Հիշեցնենք, որ 2016 թվականին բլոգեր Լապշինը ձերբակալվել էր Մինսկում՝ Ադրբեջանի պահանջով, իսկ 2017 թվականի փետրվարին արտահանձնվել էր Բաքու, որտեղ հուլիսին դատապարտվել էր երեք տարվա ազատազրկման՝ առանց սահմանված փաստաթղթերի սահմանը բազմիցս հատելու համար։ Սեպտեմբերի 14-ին Լապշինը մեկնել էր Իսրայել, քանի որ Ադրբեջանի նախագահ Իլհամ Ալիևը նրան ներում էր շնորհել։

«Ես երբեք չեմ դադարում զարմանալ բազմաթիվ հայերի ֆանտաստիկ ինֆանտիլիզմի և միամտության վրա: Հայաստանի բնակիչները բացարձակապես չեն հասկանում, թե ինչ է Ադրբեջանը, ովքեր են ադրբեջանցիները և ինչ է Ալիևի ռեժիմը։ Վերջին օրերին ադրբեջանցիները տարածել են «ուրախ» հայ բանտարկյալների, այդ թվում՝ Արայիկ Հարությունյանի, Դավիթ Բաբայանի և այլոց լուսանկարները, ովքեր իբր գրադարանում գրքեր են կարդում, հեռուստացույց են դիտում և նույնիսկ ջեռուցման համակարգեր կան խցում (Արայիկ Հարությունյանի): Դրանից հետո շատ հայեր գրում են «Նրանց մոտ ամեն ինչ լավ է, ամեն ինչից գոհ են, հանգստանում են», և այս հիմար մեկնաբանությունները տասնյակ լայքեր են հավաքում այլ միամիտ հիմարներից։

Ժողովո՛ւրդ, դուք չեք հասկանում, որ դրանք բեմադրված լուսանկարներ են։ Ինձ պահեցին Բաքվի Քուրդախանի բանտում և տարան գրադարան՝ ալիևյան լրատվամիջոցների համար լուսանկարվելու համար։ Ադրբեջանցիներն ինձ գիրք նվիրեցին, ասացին՝ ժպտա, այլապես կզրկվեմ բանտի բակում զբոսանքներից։ Հետո ինձանից վերցրեցին գիրքը և վերադարձրին կեղտոտ ու գարշահոտ խուց, որտեղ ինձ պահեցին ամբողջ յոթ ամիս։

Բանտի խցերն իրականում շատ ավելի վատն են՝ նրանց տեղափոխել են բժշկական շենք՝ լուսանկարվելու։ Բժշկական շենքում կան մի քանի էլիտար խցեր, որոնք նման են լուսանկարում երևացողներին։ Սովորական խցերում ջեռուցում չկա, բանտարկյալները ձմռանը սառչում են, քնում են պատառոտված սովետական վերմակների տակ՝ ամբողջ հագուստը հագած։ Այնտեղ էլ հեռուստացույց չկա, բայց ինձ տարան բժշկական շենքի մի խուց, որտեղ հեռուստացույցներ կային լուսանկարելու համար։

Երբ կարդում եմ այն անհեթեթությունը, որ հայերը գրում են հայ բանտարկյալների «ուրախ» դեմքերի մասին, ուղղակի զզվում եմ նման հայերից։ Անկախ լուսանկարում պատկերված այս մարդկանց ինքնությունից (շատերին պետք է դատել դավաճանության և կաշառակերության համար), նրանք իսկապես բատ վիճակի մեջ են և օգտագործվում են որպես Հայաստանի վրա ճնշում գործադրելու գործիք։ Դուք պետք է հասկանաք, որ Ադրբեջանն այսօր ոչնչով չի տարբերվում թալիբներից կամ ԻՊ-ից։  Այս բանտարկյալներին Բաքվի բանտում լրջորեն սպառնում են խոշտանգումներով և մահով:

Հիշեցնեմ, որ այս նույն բանտում ադրբեջանցիները, «Ալլահ աքբար» գոռալով, ինձ կիսամահու ծեծեցին, կոտրեցին ձեռքս, մատներս, երեք կողերս, ծնոտս ու  առջևի ատամներս։ Դա տեղի ունեցավ մոտ երեք ամիս այն բանից հետո, երբ նրանք ինձ լուսանկարեցին «երջանիկ»՝ ձեռքիս գիրքը: Եվրոպական դատարանը 2021 թվականի մայիսի 20-ի որոշմամբ Ադրբեջանին մեղավոր է ճանաչել ապօրինի ձերբակալության, դաժան խոշտանգումների և սպանության փորձի համար»,-գրել է Լապշինը։