Ձեր վստահելի աղբյուրը

«Հույս ունեմ, որ այս գործով վեճը շարունակելու առիթ չի լինի, թեպետ հասկանում եմ, որ ԱԱԾ-ն կդիմի վերաքննիչ դատարան։ Բայց նաև մի փոքր հույս ունեմ, որ ԱԱԾ-ն խորապես ծանոթանալուց հետո կփորձի լուծումներ գտնել նման իրավիճակների համար»,- ասուլիսում ասաց փաստաբան Ռուբեն Մելիքյանը՝ խոսելով վարչական դատարանի որոշման մասին, որով բավարարել է ՀՅԴ-ական գործիչներ  Մուրադ Փափազյանի և Մասիս Աբրահամյանի դատական հայցերն ընդդեմ ՀՀ ԱԱԾ-ի՝  պարտավորեցնելով ՀՀ ազգային անվտանգության ծառայությանը Մուրադ Փափազյանի և Մասիս Աբրահամայանի վերաբերյալ տվյալները հանել ՀՀ տարածքում անցանկալի համարվող օտարերկարցիների տվյալների բանկից։

Ռ.Մելիքյանն ասաց, որ ՀՀ Սահմանադրության համաձայն,  Հայաստանի Հանրապետությունը հիմնադրվել է  որպես հայ ժողովրդի կողմից ստեղծված պետություն։

«Մեր գաղափարն այն է, որ առնվազն այն դեպքերում, երբ խոսքը վերաբերում է  Սփյուռքի ներկայացուցիչներին, ազգությամբ հայերին, այն էլ համակարգային հայության ներկայացուցիչներին, հայության շահերը, արժեքները ներկայացնող Սփյուռքի կառույցերի ակտիվ անդամներին, ընդհանրապես կասկածի տակ չդրվի նրանց Հայաստան վերադառնալու իրավունքը ինչպես ՀՀ քաղաքացիների՝ հիմք ընդունելով փաստարկները՝ ՀՀ Սահմանադրությունը, որ հայ ժողովուրդն Հայաստանի Հանրապետությունը որպես պետություն հիմնադրողը, երկրորդ՝ միջազգային հեղինակավոր փաստաթուղթը, որտեղ  իր երկիր հասկացությունը չի նույնացվում քաղաքացիության հետ»,- նշեց նա։