Ձեր վստահելի աղբյուրը

Մոտ մեկ  ամիս կալանավայրում անցկացրած Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը որևէ պարագայում հիասփափություն չի ունեցել։ Նա հիասթափությունը թուլություն է համարում։

«Հիասթափություն չեմ ունեցել, դա էլ է շատ կարևոր»,- լրագրողներին ասաց Սմբատյանը։

Նա նաև կալանքի ընթացքում հիասթափություն չի ապրել ընկերներից։

«Այն ընկերները, որոնք ընկերներ էին, ավելի վերաիմաստավորվեցին ու ավելի կայուն մնացին, իսկ այն մարդիկ, որոնք իմ ընկերները չէին, մնացին նույն տեղում։ Ընդհանրապես, ոչ մի պարագայում հիասթափություն չի եղել»,- ասաց մաեստրոն:

Նա նաև պատմեց, որ քրեակատարողականում հայտնվելուց երեք օր անց բոլորն իմացել են «Սիմֆոնիկ Մանսուրյան» ծրագրի մասին. «Տիգրան Մանսուրյանին, նրա կինոերժաշտությունը գիտեն ամեն տեղ, շատ մարդիկ լսել էին «Սիմֆոնիկ Մանսուրյան» ծրագրի մասին, բայց չգիտեին, որ ես եմ իրականացնում, քանի որ միշտ մեջքով եմ լինում մարդկանց։ Ամեն դեպքում, մարդիկ նաև իմ դեմքն իմացան դրանից հետո, ինչն ունի իր դրական կողմերը»։

Ս.Սմբատյանը կարծում է, որ ամեն դեպքում կյանքում բացասական բաները վերաիմաստավորում են մարդուն:

«Իմ պարագայում ես վերահաստատեցի, որ այն, ինչ անում եմ, անում եմ ճիշտ»,- ընդգծեց նա։